भ्रष्टाचारका कारण निलम्बनमा परेका गणेश थापा फर्किए खेल क्षेत्रमा




काठमाडौं फाल्गुन १४ : फुटबलको सर्वोच्च प्रशासनिक निकाय फिफाको प्रतिबन्धमा परेका अखिल नेपाल फुटबल संघ एन्फाका पूर्व अध्यक्ष गणेश थापा खेलकुदमा पुन: सक्रिय हुने भएका छन् । भ्रष्टाचारको अभियोगमा फिफाले फुटबलका कुनै पनि गतिविधिमा संलग्न हुन नपाउने गरी १० वर्ष प्रतिबन्ध लगाएका थापाले आफनो अध्यक्षतामा नेपाल स्पोर्टस अर्गनाइजेसन स्थापना गरेका छन् ।

हाल तदर्थ समितिमा मात्रै सिमित अर्गनाइजेसनले तीन महिनापछि ब्याटमिन्टनको ठूलो प्रतियोगिता घोषणा गरेको छ । अर्गनाइजेसन स्थापनाबारे जानकारी दिन आयोजित पत्रकार सम्मेलनमा थापाले ओझेलमा परेका खेलाडीलाई खोजेर सम्मान गर्नुका साथै नयाँ प्रतिभाको खोजी संस्थाको प्राथमिकता रहेको योजना सुनाए ।

फरक प्रसङ्गमा थापाले एन्फा चुनावमा परिवर्तनको नारा दिएका कर्माछिरिङ शेर्पा समूहले जिते फुटबलकै दुर्भाग्य हुने टिप्पणी गरे । आफूले एन्फा कम्प्लेक्सको भवन निर्माण गरेको, लिगको राशि १ करोड पुर्‍याएको, ८ करोड रुपैयाँ बचत गरेको र खेलाडीहरुलाई मासिक तलब भत्ता दिएको प्रसङ्ग उल्लेख गर्दै उनले त्यसमा थप गर्न सकेमात्रै फुटबलमा सच्चा परिवर्तन हुने भन्दै चुनौती दिए । आफूसँगै झण्डै २ दशक फुटबलमा बिताएकाहरुले परिवर्तनको नारा घन्काउनु असान्दर्भिक भएको उनको टिप्पणी थियो ।

सोमबार काठमाडौंमा पत्रकार सम्मेलन गर्दै अध्यक्ष थापाले एन्फाको आशन्न निर्वाचनको सम्बन्धमा आफ्नो विचार ब्यक्त गरे । १० बर्षका लागि फुटबल सम्बन्धि कुनै पनि गतिविधिमा संलग्न हुन नपाउने गरी प्रतिबन्धमा परेको थापाले फुटबलमा कसको नेतृत्व राम्रो छ भन्नका लागि कुनै बन्देज नरहेको प्रतिक्रिया दिए ।

चुनावमा कर्माछिरिङ शेर्पाले जित हात पारेमा फुटबल विकास नभई एन्फा कांग्रेस पार्टीको भातृ संगठन बनाउने आरोप लगाए । ‘यदि उहाँ (कर्मा) ले सबैलाई मिलाएर लैजान्छु भन्नुभयो भने मैले बोलिरहनु जरुरी छैन । उहाँलाई शुभकामना दिन चाहन्छु ।’ थापाले बताए ।

अहिले १० वर्षे प्रतिबन्धको कारवाही भोगिरहेका थापाले खेल क्षेत्रले चाहेको खण्डमा कारवाही समयअघि फुटबलमा कमब्याक हुन सक्ने बताए । ‘फुटबल जीवनको अन्तिम सम्म पनि छोड्न सक्दिन । मेरो खेल प्रतिको ‘प्यासन’ हो ।’ उनले भने ।‘फुटबलमा कुनै पूर्वाग्रह राख्दैनौं, पार्टिगत रुपमा जाँदैनौं, मिलेर जान्छौं भन्नुहुन्छ भने मेरो शुभकामना छ ।’ थापाले थपे ।

मोहम्मद बिन हमामबाट छोरा गौरवको खातामा आएको एक लाख अमेरिकी डलरको सम्बन्धमा थापाले भने, ‘मैले केही गल्ती गरेको छु भने मलाई कारवाही गर्नुस् ।’ गौरवलाई दिएको रकममा गलत परिभाषित भएको दावी गरे, ‘एक रुपैयाँ पनि बेइमानी गरेको छैन ।’

Comments

comments