बोक्सीको आरोपमा कुटपिट भएको घटना मिलाउने प्रहरी निलम्बन, तीन आरोपीमाथि कारवाही




कैलाली, फागुन २७ । गत बिहीबार कैलालीको घोडाघोडी नगरपालिका–५ देउकलियामा बोक्सीको आरोपमा एक युवतीमाथि भएको ज्यादतीमा मिलापत्र गराउने प्रहरीलाई निलम्बन गरिएको छ ।

निलम्बनमा पर्नेमा सुखडस्थित ईलाका प्रहरी कार्यालयका निमित्त प्रमुख प्रहरी नायब निरीक्षक दिनेश विष्ट रहेका छन् । विष्टलाई ७ नम्बर प्रदेश प्रहरी कार्यालयले निलम्बन गरेको प्रहरी अतिरिक्त महानिरीक्षक माधवप्रसाद नेपालले जानकारी दिए ।

कुटपिट गर्ने रामबहादुर चौधरी र किस्मती चौधरीबिरुद्ध आइतबार मुद्दा दर्ता गरिएको छ भने थप एक जनालाई पक्राउ गरिएको छ । प्रहरीका अनुसार सोही घटनामा आरोपित २० वर्षीया स्मारिका चौधरी पक्राउ परेकी हुन् । यसअघि प्रहरीले रामबहादुर चौधरी र किम्मती चौधरीलाई पक्राउ गरेको थियो ।

युवतीको अवस्था खतरामुक्त

सेती अञ्चल अस्पतालमा उपचार गराइरहेकी राधाको अवस्था खतरामुक्त रहेको उपचारमा संलग्न चिकित्सकले बताएका छन् । उनको टाउको, छाती, आँखा, पेट, खुट्टा, घाँटीलगायत शरीरका विभिन्न भागमा चोट लागेको देखिएको चिकित्सकले बताए ।

ढाड र आँखामा बढी चोट देखिए पनि अवस्था भने खतरामुक्त रहेको डा. सजन केसीले बताए । भित्री चोट बढी लागेको देखिएको उनले बताए ।

पीडित युवती राधाले आँखा, घाँटीलगायत शरीरका विभिन्न भाग दुखिरहेको बताएकी छिन् । आफू राम्रोसँग बोल्न सक्ने अवस्था नरहेको उनले बताइन् ।

Comments

comments