विमानकी चालिका थिइन् पृथुला रशिद, उपचारका क्रममा भयो मृत्यु




काठमाडौं, २८ फागुन : त्रिभुवन अन्तर्राष्ट्रिय विमानस्थलमा सोमवार दुर्घटनाग्रस्त भएको विमानकी चालिका पृथुला रशिदको मृत्यु भएको छ ।

दुर्घटनापछि काठमाडौं मेडिकल कलेजमा लगिएकी रशिदको मृत्यु भएको हो । बिमानका अर्का चालक खवाज हुसेनको पनि मृत्यु भएको छ । रशिद यूएस–बांग्ला विमानको पाइलट र फर्स्ट अफिसर थिइन् । उनले आरिराङ फ्लाइङ स्कूलबाट विमान चलाउन सिकेकी थिइन् ।

पाइलटले कन्ट्रोल रुमको निर्देशन नमान्दा विमान दुर्घटना भएको विमानस्थल अधिकारीहरुले बताएका छन् ।

विमान दुर्घटनामा मृत्यु हुनेको संख्या ४९ पुग्यो

त्रिभुवन अन्तर्राष्ट्रिय विमानस्थलमा सोमबार युएस बंगलाको एक विमान दुर्घटना हुँदा ४९ जनाको मृत्यु भएको छ । बंगलादेशको राजधानी ढाकाबाट आएको विमान अवतरण गर्नेक्रममा विमानस्थलमा दुर्घटना हुँदा अहिलेसम्म ४९ जनाको मृत्यु भएको नेपाल प्रहरीका प्रवक्ता मनोज न्यौपानेले बताए ।

उनकाअनुसार ४० जनाको विमानस्थलमै र ९ जनाको उपचारकाक्रममा केएमसी अस्पतालमा मृत्यु भएको हो । ८ जनाको सिनामंगलस्थित केएमसी र एकजनाको त्रिवि शिक्षण अस्पताल महाराजगन्जमा मृत्यु भएको हो । पाइलटको पनि मृत्यु भएको छ ।

२२ घाइतेहरुको राजधानीका विभिन्न अस्पतालमा उपचार भइरहेको छ । १६ जनाको केएमसीमा, चारजनाको नर्भिकमा तथा ग्रान्डी र ॐ अस्पतालमा एक/एक जनाको उपचार भइरहेको छ ।

घाइतेमध्ये दुईजना सामान्य घाइतेमात्र रहेको र अरु घाइते अधिकांशको अवस्था गम्भीर रहेको जनाइएको छ । विमानमा ६७ यात्री र चारजना चालकदलका सदस्य सवार रहेका थिए । तीमध्ये ३३ जना यात्री नेपाली रहेका थिए । यात्रीहरुमध्ये दुईजना बालबालिका, २८ जना महिला र ४१ जना पुरुष यात्री रहेको विमानस्थलले जनाएको छ ।

सो विमान अवतरण गर्नेक्रममा ‘ओभरसुट’ भइ पूर्वतर्फको खोंचमा खसेर दुर्घटना भएको जनाइएको छ । दुर्घटनालगत्तै विमानमा आगो लागेको थियो । यद्यपि, विमानको आगो केही बेरमै नियन्त्रणमा लिइएको थियो । विमान सोमबार दिउँसो २ बजेर १८ मिनेटमा दुर्घटना भएको थियो ।

Comments

comments