विश्वकप खेल्ने टिमसँग किरण चेम्जोङको टोली हार्‍याे




काठमाडौं : रुसको मस्कोमा हुने सडक बालकालिकाहरुको विश्वकप खेल्न जाने नेपाली टिम अहिले अन्तिम चरणको तयारीमा व्यस्त छ । एन्फा कम्प्लेक्स सातदोबाटोमा तयारी गरिरहेको नेपाली टिमले मंगलबार भएको मैत्रीपूर्ण खेलमा प्रायोजक वेस्टर प्रोपर्टिजको टिमलाई हराएको छ ।

राष्ट्रिय टिमका गोलरक्षक किरण चेम्जोङ पनि सहभागी रहेको प्रायोजकको टिमलाई सडक बालबालिका विश्वकप खेल्ने नेपाली टिमले ५–२ ले हरायो । राष्ट्रिय टिमका गोलकिपर किरण चेम्जोङ जेठ ३ गते हुने एनएसजेएफ अवार्ड अन्तर्गत पिपुल्स च्वाइस अवार्डको मनोनयनमा परेका छन् ।

सडक बालबालिका विश्वकप खेल्ने नेपाली टिम भने अन्तिम चरणको तयारीमा व्यस्त छ । सडक बालबालिका विश्वकप प्रतियोगिता यसै महिनाको २६ गतेदेखि रुसको मस्कोमा हुँदैछ ।

एन्फा निर्वाचनमा अर्को किचलो

अखिल नेपाल फुटवल सघं एन्फाको आगामी शनिवार हुने निर्वाचन असंवैधानिक भएको तर्क गर्दै विधिसम्मत चुनाव गर्न अध्यक्षका प्रत्यासी मणि कुवँरले माग गरेका छन् । आगामी शनिवार हुने निर्वाचनमा आफुहरु सहभागि हुने नहुनेबारे छलफल गरेर निर्णय गर्ने आज राजधनीमा पत्रकार सम्मेलन गर्दै कुवँर बताए ।

निर्वाचन गर्ने निर्णय कार्यकारिणी समितिबाट नभएकाले भ्रम छर्ने काम भएको बताउदै कुवँरले साधारणसभा बोलाउन ६० दिनको सुचना हुनुपर्ने व्यवस्था भएपनि ८ दिनको सुचना दिएको भन्दै असन्तुष्टि जनाएका छन् । निर्वाचन कमिटिलाई जबरजस्ती निर्वाचनको मिति घोषणा गर्न लगाएको आरोप समेत लगाएका छन् ।

पहिलेको निर्वाचन अर्को पक्षको कारण स्थगित भएको भन्दै उनले एकपक्षीय रुपमा निर्वाचन नगराउन निर्वाचन समितिलाई सुझाएका छन् । निर्वाचन कमिटि र एन्फाले विधिसम्मत तरिकाले निर्वाचन गर्नुपर्ने उनको माग छ ।

रियल म्याड्रिड च्याम्पियन्स लिग फाइनलमा

स्पेनिस क्लब रियल म्याड्रिड युरोपेली च्याम्पियन्स लिगको फाइनलमा प्रवेश गरेको छ । मंगलबार बायर्न म्युनिखलाई २-२ को बराबरीमा रोक्दै समग्रमा ४-३ को जितसहित रियल उपाधि भिडन्तमा स्थान पक्का गर्न सफल भयो ।

खेलको तेस्रो मिनेटमा बायर्नका जोसुअा किमिचले पाहुना टोलीलाई अग्रता दिलाएका थिए । तर करीम बेन्जेमाले ११ अौं मिनेटमा बराबरी गोल फर्काए । लगत्तै दोस्रो हाफको सुरुमा उनैले रियललाई अग्रता दिलाए । बायर्नको लागि रियलका पूर्व खेलाडी हामेस रोड्रिग्वेजले गोल गर्दै खेल २-२ को स्थितिमा ल्याए ।

पहिलो लेगमा २-१ को हार बेहोरेको बायर्न सेमिफाइनलबाट बाहिरियो । रियलले लगातार तेस्रो उपाधिका लागि रोमा र लिभरपुलको विजेतासँग खेल्नेछ ।

Comments

comments