‘झापा गोल्डकपमा म बाट गल्ती भयो माफी माग्न चाहन्छु’: नवयुग




इलाम । गत फागुनमा भएको झापा गोल्डकपमा दर्शकहरुमाझ सम्हालिन नसक्दा नवयुग आलोचित बनेका थिए । झापामा गरेको गल्तीको प्रायश्चित गर्दै नवयुग भन्छन ‘प्लेयरको गल्ती हुन्छ । म बाट पनि गल्ती भयो, दर्शकहरुमाझ म बाट कमजोरी अवश्य भएको हो त्यसका लागी म हात जोडेर माफी माग्न चाहन्छु । आशा छ दर्शकहरुले मलाई माफ गर्नुभयो होला । ’

इलामः फुटवल खेलमा पछिल्लो समय नवयुग श्रेष्ठ चर्चित नाम हो । इलामको साविक मंगलबारे एक (देउमाई नगरपालिका चार) मा जन्मिएका उनी राष्ट्रिय टीममा समावेश भएसँगै नेपालले अन्तराष्ट्रिय उपाधि चुम्यो । २३ वर्षको उपाधी खडेरी तोडेर नवयुगले नेपाली फुटबलमा नयाँ युग नै शुरु गरे । नवयुग र नेपाली फुटबल बिच केमेस्ट्रि नै मिलेको छ । २३ बर्ष अघि नेपालले साफ गेमको उपाधी जित्दा बालगोपाल महर्जन नेपाली टिमका मुख्य खेलाडी थिए भने सन २०१६ को साफ जित्दा प्रशिक्षक । बंगबन्धु गोल्डकपमा नेपाललाई उपाधि जिताएर मोस्ट भ्यालुएबल प्लेयर, हाइएस्ट स्कोरर बनेका नवयुगले साग फुटबल उपाधिका लागि निर्णायक गोल गरेर नेपाली फुटबलप्रेमीलाई दुवै हातमा लडडु दिलाएका छन् ।

फुटबलमा अहिले नवयुगको उचाइ ह्वात्तै बढेको छ । तर, सौभाग्य नै मान्नुपर्छ, उनी फुटबल छिर्नुको खास कारणचाहिँ उचाइ कम हुनु हो । इलाम मंगलबारेको त्रिवेणी युथ क्लबले ४ फिट १० इन्चभन्दा कम उचाइ भएकालाई फुटबल सिकाएर टिम बनाउने योजना ल्याएको थियो । ‘फुच्चे केटा’हरूको टिममा सामेल हुन पाएका नवयुगले प्रगति गर्दै अहिले नेपालको उचाइ बढाइदिएका छन् ।

नवयुग श्रेष्ठ बुवा चन्द्रकेशर र आमा बसुन्धराका कोखबाट जन्मिएका उनी सानै उमेर देखी खेलकुद क्षेत्रमा चासो राख्दथ्ये । त्यसमा पनि उनी फुटवलमा अझ समय दिन्थ्ये । उनका बुबा चन्द्रकेशरले पनि छोराको प्रगतीले सिंगो इलाम मात्र नभएर देशले नै गर्व ठाउँ वनाएको वताए । नवयुग सँगै टीमले नै राम्रो खेल खेलेका कारण देशले नै अन्तराष्ट्रिय स्तरको उपाधि चुम्न सफल भएको वताए । त्यस्तै उनकी आमा बसुन्धराले पनि छोराले गरेको प्रगतीले गर्व गर्ने ठाउँ वनाएको वताइन् । सानै उमेर देखी किचनमा जस्तो पाक्यो केहि दोस नलगाई खाने उनी खानाप्रति खासै चासो नराख्ने गरेको उनकी आमाको भनाई छ । आमा बसुन्धराका अनुसार सानो उमेर छँदा पढ्नमा भन्दा बाहिरी क्षेत्रमा नै चासो राख्ने उनी उमेरसँगै पढाइमा पनि मेहनत गर्न थाले ।

उनका घरमा हाल बुबा आमा र हजुर आमा मात्र छन् । एउटी बहिनी नविनाको केहि वर्ष अघि नै बिहे भइसकेको छ । हजुरआमा हर्क मायाले पनि नातीले देशलाई दिएको योगदानले छाती फुलेको वताइन् । कतिखेर भेट्नु झैँ लाग्न थालेको वताउने उनी सानोछँदा हुर्काउन पनि आमाले भन्दा आफुले नै वढि मेहनत गरेको वताउँछिन् । उनका बुबा पेशाले शिक्षक हुन् ।

स्थानिय भानुभक्त उमाविमा कक्षा एकबाट अध्यन सुरु गरेका नवयुगले कक्षा १२ सम्म त्यहि अध्यन गरे । भानुभक्त उमाविका पुर्व प्रधानाध्यापकले पनि नवयुगबाट पहिल्यै देखी आशा गरेको वताए । सानै उमेर देखी खेलमा लागेका उनी पढाइमा भन्दा पनि खेल क्षेत्रमा नै लाग्ने गरेको शिक्षको भनाई छ । त्यस्तै खेल शिक्षक तेजकुमार बाँस्तोलाले पनि सानै उमेर देखी खेलकुदमा राम्रो मेहनत गर्ने गरेको वताए । उनको मेहनतका कारण नै यस स्थानमा आएको वताउने उनी बाट आशा पनि लगेको वताउँछन् ।

जिल्लाको त्रिवेणी युथ क्लबमा आबद्ध भएपछि उनको खेलक्षेत्रको सपना पुरा हुन थाल्यो । नवयुग २०६० सालमा जिल्लास्तरीय प्रतिस्पर्धाबाट छानिएर इलामको यू–१४ टिममा परे, जुन टिमले राष्ट्रिय स्तरको जिविस कप नै जित्यो । अर्को वर्ष इलामले जिविस कपको उपाधि रक्षा गर्दा पनि उनी मुख्य खेलाडी थिए । जिविस कपको खेल हेरेर एन्फाले इलामका दुई खेलाडीलाई छनोट गर्दा भने नवयुग अटाएनन् ।

एन्फाले यू–१६ छनोटको लागि देशभरबाट दरखास्त आह्वान गरेको थियो । उनले पनि आवेदन दिए । उनी काठमाण्डौ त गए तर, एन्फाले उनलाई छनोट गरेन । एन्फाकै महासचिव धीरेन्द्र प्रधानले उनलाई पु¥याएका थिए एपिएफ क्लबमा । धिरेन्द्र सो परिवारका नातेदार पनि हुन् । तर, त्यहाँ पनि उनी छनोटमा परेनन् । बाध्य भएर उनी सी डिभिजनको क्लबमा खेल्न थाले । त्यपछि कर्माछिरिङ शेर्पाको नजरमा परेपछि उनी बी डिभिजन खेल्दै गरेको हिमालयन शेर्पा क्लबमा आबद्ध भए । नवयुग हिमालयन क्लबमा त गए, तर मैदानमा झर्न पाएनन् । प्याराफिटमा बसेर प्रतियोगिता हेरे, प्रतियोगिता सकिएपछि दर्शकजस्तै घर इलाम फर्किए ।

इलाम आउँदा उनका साथीले उनलाई नेपाल आर्मीमा भर्ती भए फुटवल खेल्न पाइन्छ भन्ने कुरा सुनाए । यो उनको अन्तिम आशा पनि थियो, धनकुटा पुगेर छनोटका लागि दगुरे, मिहिनेत खेर गएन । उनले सोचेजस्तै भर्ती भएपछि आर्मीका आन्तरिक प्रतियोगितामा फुटबल खेल्न थाले । नौ महिनाको सैन्य तालिमपछि उनी धनकुटाको हिलेबाट सीधै त्रिभुवन आर्मी क्लब पुगे । ०६६ सालको अन्तिममा क्लबमा आबद्ध भएका उनले ०६७ सालको नकआउट फुटबल प्रतियोगिताबाट ए डिभिजनमा डेब्यु गरे । उनी क्लबमा आएकै वर्ष सन्तोष नेपाली शान्ति मिसनमा गएकाले नवयुगले स्थान पाए । अवसर सदुपयोग गर्दै उनले आर्मीको भरपर्दो खेलाडी बने । तर, राष्ट्रिय टिममा भने स्थान बनाउन सकेका थिएनन् ।

हुन त हजुरआमा पनि नातीको प्रगती हेर्न एकदमै आतुर रहिछन् । उनले ज्योतीषीलाई चिना समेत हेराउन भ्याइछन् । चिना हेराउँदा ज्याुतिषीले पनि जागिर पाउने वताएको हजुरआमाले सुनाइन् । जागिरको सुरुमा अत्यान्तै कठिनाई भोग्नु पर्ने ज्योतिषिले सुनाएपछि उनको मनमा एक खालको पिर भए पनि जागिर पाउने आशाले भने हजुरआमाको मन शान्त भएको थियो । हजुर आमाले भनीन् ‘ मैले पशुपतीनाथसँग प्रार्थना गरेको छु । मेरो नातीले वलमा कहिल्यै हार ब्यहोर्नु नपरोस भनेर ।’

नकुटाबाट नेपाल आर्मीमा प्रवेश गरेका उनी आर्मीका भरपर्दा खेलाडीको परिचय बनाए पनि उनले राष्ट्रिय टिममा भने स्थान पाउन सकेनन् । ०६८ देखि नै उनलाई राष्ट्रिय टिमको प्रारम्भिक छनोटमा बोलाइन्थ्यो । तर, सधँै फालिन्थे । उनको खासै गुनासो भने थिएन । अहिले नपरे अर्को पटक पर्छु भन्दै चित्त बुझाउँथे ।

सन २०१६ को साफ च्याम्पियनसिप अगाडी उनी प्रशिक्षक बालगोपाल मर्हजनको नजरमा परे । साफ च्याम्पियनसिपका लागि छनोटको पहिलो चरणमा उनी नेपाली टिममा परे । साफ च्याम्पियनसिपअघि नेपालले भारतसँग मैत्रीपूर्ण खेल खेल्दा उनले राष्ट्रिय टिमबाट डेब्यु गरे तर अपेक्षिकृत खेल देखाउन भने सकेनन् । तर प्रशिक्षक महर्जनले नवयुगभित्र संभावना देखेका थिए । त्यसै कारण बंगबन्धु गोल्डकपमा भने उनी पहिलो रोजाइमा परे । तर, लिग चरणका तीन खेलमा अवसर पाएर पनि गोल गर्न सकेनन् । सेमिफाइनलमा भने माल्दिभ्सविरुद्ध ह्याट्रिक गर्दै सनसनी मच्चाए ।

बहराइन विरुद्धको फाइलनमा समेत गोल हान्दा उनी सर्वाधिक गोलकर्ता र मस्ट भ्यालुएवल प्लेयर बनिसकेका थिए । बंगबन्धु लगत्तै सागमा त उनले दुईवटा ह्याट्रिक गरे । एक महिनामा तीन ह्याट्रिक पूरा गरेका उनले भारतविरुद्धको निर्णायक खेलमा निर्णायक गोल गरेर नेपाली फुटबललाई नवयुगमा प्रवेश गराए । नवयुगले नेपाली फुटबलका नयाँ युग नै प्रारम्भ गरेको फुटबल विश्लेषकहरुको भनाई छ ।

गृह जिल्लामा भइरहेको चौथो अन्तराष्ट्रिय आमन्त्रण माइभ्याली प्रतियोगिता खेल्न इलाम आएका नवयुग बंगवन्धुपछि कायम गरेको फुटबल हाइट कायम गर्न तल्लिन रहेको बताउँछन । ‘ बंगबन्धु खेलेपछि नेपाली फुटबलले म बाट जे आशा गरेको थियो त्यो कायम गर्न कसरत गरिरहेको छु’ । माइभ्याली गोल्डकपमा आर्मीको लागी मनाङ र थ्रीस्टार मुख्य प्रतिद्धन्द्धीका रुपमा रहेको नवयुगले बताए । न्युज २४ नेपाल बाट

Comments

comments