केन्यामा बाँध भत्किँदा मृत्यु हुनेको संख्या ४१ पुग्यो




केन्या, वैशाख २८ । केन्यामा एउटा बाँध भत्किँदा मृत्यु हुनेको संख्या ४१ पुगेको छ भने थुप्रै मानिस बेपत्ता छन् । नाकुरु प्रदेशमा रहेको बाँध भत्किएपछि त्यस वरपरका बस्ने २५ सय मानिस विस्थापित बनेको जनाइएको छ । अधिकारीहरुले मृत्यु हुनेको संख्या अझै बढ्ने अनुमान गरेका छन् ।

बाँधको पानीले घर, विद्यालय भवन र व्यापारिक कार्यालयहरु क्षतिग्रस्त बनाएको छ । स्थानीय बासिन्दा, रेडक्रसका स्वयंसेवकलगायत उद्धार टोलीले उद्धार गरेका छन् । माटो र हिलोमा पुरिएका ४० भन्दा बढीलाई उद्धार गरिएको छ ।

बाढी पहिरोकै कारण केन्यामा दुई महिनाको अवधिमा १३० जनाको मृत्यु भएको र दुई लाख २० हजारभन्दा बढी मानिस विस्थापित बनेको बताइएको छ । (एजेन्सी)

तिवारीको हत्यामा संलग्न कुशवाह जेल चलान

हिन्दु युवासंघ नेपालका अध्यक्ष काशीनाथ तिवारीको हत्यामा संलग्न सियारामप्रसाद कुशवाह जेल चलान भएका छन् ।

वि.सं. २०६७ असारमा पर्साको वीरगन्जस्थित अशोक वाटिकामा तिवारीको हत्यामा संलग्न कुशवाहलाई नेपाल प्रहरीको केन्द्रीय अनुसन्धान ब्यूरोले बिहीबार पक्राउ गरी शुक्रबार जेल चलान गरेको हो । 

बबिता तिवारीको जाहेरीमा कर्तव्य ज्यान मुद्दामा उच्च अदालत जनकपुरको फैसलाअनुसार सर्वस्वसहित जन्मकैदको सजाय ठहर भएपछि फरार रहेका ३४ वर्षीय कुशवाहलाई ब्यूरोको टोलीले बिहीबार काठमाडौंको शान्तिनगरबाट पक्राउ गरेको हो ।

कुशवाहलाई फैसला कार्यान्वयनका लागि काठमाडौं जिल्ला अदालतमा पेस गरेकामा अदालतको आदेशले कैद भुक्तानका लागि शुक्रबार कारागार कार्यालय डिल्लीबजार पठाएको हो । रासस

Comments

comments