सन्दिपले खेल्न नपाए पनि मोदी भने : “सन्दीपले आईपीएल खेल्नु दुई देशको सम्बन्धमा नयाँ आयाम” (भिडियो हेर्नुहोस)




काठमाडौं, वैशाख २९ : भारतीय प्रधानमन्त्री नरेन्द्र मोदीले नेपाल र भारतको सम्बन्ध समयानुसार गतिशिल र थप बलियो हुँदै गएको दाबी गर्नुभएको छ । काठमाडौ महानगरपालिकाले आयोजना गरेको अभिनन्दन ग्रहण गरेपछिको कार्यक्रममा मोदीले दुई देशको सम्बन्ध ऐतिहासिक र राजनीतिक मात्र नभइ नागरिक नागरिकबीचमा पनि उत्तिकै बलियो रहेको बताउनुभएको हो ।

नेपालका सन्दीप लामिछानेले आईपीएल क्रिकेटमा अनुबन्ध भएको भन्दै मोदीले दुई देशबीचको सम्बन्ध यसले अझै सुदृढ बनाएको र भावी दिनमा नागरिक नागरिकको सम्बन्ध अझ बलियो हुने दावी पनि गर्नुभयो । तर मोदीले यसो भने पनि सन्दिपले अहिलेसम्म भने अाईपिएलमा डेब्यु गर्ने अवसर पाएका छैनन् । उनले दुई पटकको नेपाल यात्राका क्रममा पवित्र धार्मिकस्थल पशुपतिनाथ, जानकी मन्दिर र मुक्तिनाथको दर्शन गरेको भन्दै अर्को पटक समय मिलाएर बुद्धको जन्मभूमि लुम्बिनी जाने बताएका हुन् ।

काठमाडौं महानगरपालिकाले गरेको नागरिक अभिनन्दनपछि सम्बोधन गर्दै मोदीले भने, ‘दुई पटकको यात्रामा पशुपतिनाथको यात्रा गर्न पाएँ। यो पटक मुक्तिनाथजनकपुर जाने अवसर पनि पाईयो । यो महत्वपपूर्ण तीर्थ स्थलमात्र होइन । भारत र नेपालको अटुट सम्बन्धको उदाहरण हो । म अर्को पटक बुद्धको जन्मभूमि लुम्बिनी जाने पक्कै प्रयास गर्नुे छु । बुद्ध हामी दुबै देशको मानवजातिको धरोहर हो । ’

भारतले बुद्धबारे गलत प्रचार गरिरहेको बेला मोदीले बुद्ध नेपालमै जन्मिएको बताएका हुन् । नेपालीमा सम्बोधन सुरु गरेका मोदीले आफूलाई नागरिक अभिनन्दन गरेकोमा काठमाडौं महानगरपालिकाका मेयर विद्यासुन्दर शाक्यलाई धन्यवाद समेत थिए । उनले नेपालीमा भने, ‘राष्ट्रिय सभा गृहमा तपाईहरुलाई पनि अभिनन्दन गर्दछु । मलाई अभिनन्दन गर्नुभयो । म आभारी छु । यो मेरो मात्र हाेइन पुरै भारतको सम्मान हो ।’

नेपाल र भारतबीचको आफ्नै खालको सम्बन्ध रहेको भन्दै मोदीले आफूले पनि अभिनन्दित भएर सौभाग्य पाएको बताए । जहिले पनि नेपाल आउँदा आफूलाई आत्मीयताको अनुभूति हुने माेदीले बताए । भिडियो हेर्नुस्

आजको दिनमा जनकपुरले निकै ठुलो सन्देश दिने भन्दै मोदीले काठमाडौंको पनि आफ्नै छबी रहेको बताए । ‘ त्यो शहरको होइन । त्यो भौगोलिक उपत्यकाको मात्र पनि होइन । हाम्रो छिमेकी राजधानी मात्र भनेर होइन । बुद्ध र सगरमाथाको राजधानी भएर पनि होइन । काठमाडौ एउटा पुरापुरी दुनियाँ हो । त्यसको त्यति नै पुरानो इतिहास छ जति पुरानो इतिहास हिमालको छ ।’, काठमाडाैकाे बयान गर्दै उनले भने ।

काठमाडौंमा काठको मण्डप मात्र नभइ साझा समझदारीको विविधताको विरासत र त्यसको ठुलो मनको झलक भेटिने उनको भनाई छ । मोदीले भने, ‘ नागार्जुनको जंगल होस् अथवा शिवपुरी अथवा वागमतीको मन्जुश्रीको गुफा किन नहोस् । दुनियामा आफैमा अनौठो छ । घरहरुको छतबाट एकातर्फ धौलागिरी र अर्कोतिर सगरमाथा र कन्चनगंगा देखिन्छ । यस्तो कहाँ सम्भव छ ? त्यो सम्भव छ भने मात्र काठमाडौंमा मात्र छ ।’

मोदी स्वदेश फिर्ता

दुई दिनको नेपाल भ्रमण सकेर भारतीय प्रधानमन्त्री नरेन्द्र मोदी स्वदेश फिर्ता हुनुभएको छ । जनकपुरबाट नेपालको भ्रमण सुरु गर्नुभएका भारतीय प्रधानमन्त्री मोदीले शुक्रबार जानकी मन्दिरमा विषेश पूजा गर्नुभएको थियो । प्रदेश नम्बर २ मा नागरिक अभिनन्दनमा सहभागी भएर मोदी शुक्रबार नै काठमाडौं फर्कनुभएको थियो ।

 

शुक्रबार राष्ट्रपति विद्यादेवी भण्डारी र उप–राष्ट्रपति नन्दबहादुर पुनसँग शिष्टाचार भेटवार्त गर्नुभएको थियो । शनिबार मुस्ताङको मुक्तिनाथको यात्रा गर्नुभएका मोदीले काठमाडौंको पशुपतिनाथको भ्रमण समेत गर्नुभएको थियो ।

उहाँँले शनिबार नै नेपाली कांग्रेस, माओवादी केन्द्र, फोरम तथा राजपाका नेताहरुसँग पनि भेटवार्ता गर्नुभएको थियो । मोदीलाई काठमाडौं महानगरपालिकाले राष्ट्रियसभा गृहमा गार्ड अफ हनर प्रदान गरेको थियो । दुई दिनको नेपाल भ्रमण सकेर उहाँ शनिबार नै स्वदेश फिर्ता हुनुभएको छ । परराष्ट्रमन्त्री प्रदीप ज्ञवालीले मोदीलाई बिदाई गर्नुभएको हो ।

Comments

comments