प्रधानमन्त्रीद्वारा आलोचना भएपछि मुख्यमन्त्री राउतले यसो भने….




काठमाडौं । प्रदेश दुईका मुख्यमन्त्री लालबाबु राउतले प्रधानमन्त्रीले संसदमा आफ्नो आलोचना गरेर मर्यादा भुलेको आरोप लगाएका छन् । नेपाली रेडियो नेटवर्कमा पत्रकार ऋषि धमलासँग कुरा गर्दै मुख्यमन्त्री राउतले संविधान संशोधनको एजेण्डा जीवित रहेको बताए । ‘संविधान संशोधनको एजेण्डा हामीले उठाउँदै आएको कुरा सबैलाई थाहा छ’, उनले भने, ‘सबै कुरा जान्दा जान्दै संसदमा आलोचना गर्नु उहाँको कुरा होला !’

उनले संविधान संशोधनमा आफूले बोल्दै आएको कुरालाई भारतीय प्रधानमन्त्री नरेन्द्र मोदीको नागरिक अभिनन्दनका बेला भनेको बताए । ‘भारतीय प्रधानमन्त्री नरेन्द्र मोदी समक्ष प्रदेश २ का जनताको भावना राखेको हुँ’, मुख्यमन्त्री राउतले भने, ‘ओलीजीले असन्तुष्टि जनाउनुको कुनै अर्थ छैन । संविधान संशोधन साँचो कुरा हो । झुठलाई साँचो बनाउन सकिँदैन ।’

मोदीको नागरिक अभिनन्दनका बेला प्रदेश २ का मुख्यमन्त्री राउतले संविधान संशोधनको कुरा उठाएपछि सबैले आलोचना गरेका थिए । त्यति मात्रै होइन आइतबारको संसद बैठकमा प्रधानमन्त्री ओलीले पनि असन्तुष्टि जनाएका थिए ।

प्रधानमन्त्रीले समेत आलोचना गरिसकेको अवस्थामा तपाईले पदबाट राजीनामा दिनु हुन्छ ? भन्ने प्रश्नको जवाफमा राउतले भने, ‘मैले राजीनामा दिँदै । कसैले दिएको मुख्यमन्त्रीको पद हो र ? मेरो कारण लाखौँ जनता अभिनन्दनमा आएका थिए । मैले राजीनामा दिने सवाल छैन ।’

पदीय मर्यादा विपरित नागरिक अभिनन्दन कार्यक्रम मन्त्रीले उद्घोषण गरेको तथा कार्यक्रमको अध्यक्षता मुख्यमन्त्रीले गरेको बारेमा सोधिएको प्रश्नको जवाफमा राउतले भने, ‘त्यो हाम्रो कुरा हो । कसैले सिकाउनु पर्दैन । जे निर्णय गरे पनि हामीले गर्ने हो ।’

मोदीको नागरिक अभिनन्दन जनकपुर नगरपालिकाले गरेको थियो । तर, कार्यक्रमको अध्यक्षता मेयरले गर्नुपर्नेमा मुख्यमन्त्री राउत आफैले गरेका थिए ।

माेदीसामु प्रदेश- २ का मुख्यमन्त्रीले दिएकाे अभिव्यक्ति सच्याउन भीम रावलकाे माग

प्रदेश २ का मुख्यमन्त्री लालबाबु राउतले भारतीय प्रधानमन्त्री नरेन्द्र मोदीसामु दिएकाे अभिव्यक्ति सच्याइनुपर्ने नेकपा एमालेका उपाध्यक्ष भीम रावलले माग गरेका छन् । सांसद समेत रहेका भीम रावलले माेदीकाे नेपाल भ्रमणका सिलसिलामा प्रदेश- २ का मुख्यमन्त्रीले दिएको अभिव्यक्तिप्रति आपत्ति जनाउँदै सच्याउन माग गरेका हुन् ।

अाज (सोमबार) काे प्रतिनिधिसभाको बैठकमा बाेल्दै रावलले भारतीय प्रम माेदीको जनकपुरमा भएको अभिनन्दनमा प्रदेश २ का मुख्यमन्त्री राउतले दिएको अभिव्यक्ति तत्काल सच्याउनुपर्ने बताए । विशेष समय लिएर बोलेका उनले मुख्यमन्त्री राउतसँग सो अभिव्यक्ति तत्काल सच्याउन गम्भीर ध्यानाकर्षण गराएका हुन्

जनकपुरमा भएको मोदीको नागरिक अभिनन्दन कार्यक्रममा मुख्यमन्त्री राउतले ‘संविधानविरुद्ध संघर्ष’ गरिरहनु परेको अभिव्यक्ति दिएका थिए। सो अभिव्यक्ति कूटनीतिक मर्यादासमेत उलंघन हुनेगरी आएको भन्दै उपाध्यक्ष रावलले तत्काल सच्याउन माग गरेका हुन्। छिमेकी देशका प्रधानमन्त्री आएका बेला मुलुकलाई कमजोर बनाउने खालको अभिव्यक्त आएकोमा उनकाे अापत्ति रह्याे ।

रावलले मोदी भ्रमणका बेला सत्तारुढ भारतीय जनता पार्टीका सांसद कीर्ति आजादले दिएको अभिव्यक्तिकाे पनि घाेर निन्दा गरेका छन् । उनले सो अभिव्यक्ति फिर्ता लिन पनि सांसद आजादको गम्भीर ध्यानाकर्षण गराए। मोदी नेपाल भ्रमणमा आएका बेला भारतीय जनता पार्टीका सांसद आजादले ‘जनकपुरलार्इ भारतमा फिर्ता गर्नुपर्छ’ भन्ने अाशयकाे ट्विट गरेका थिए।

नेपालको अस्मितमाथि नै प्रश्न उठाउने गरी आएको आजादको सो भनाई कुनै पनि नेपालीलाई सैह्य नहुने चेतावनी पनि दिए। एमालेले आजादको भनाइप्रति आपत्ति जनाउँदै आइतबार नै एक प्रेस विज्ञप्ति जारी गरिसकेको छ।

Comments

comments