खुल्यो डिभिलियर्सको खेलजीवनको ठूलो रहस्य, संयोगले बनेको थियो विशाल विश्व रेकर्ड




एजेन्सी। केही दिनअघि मात्र सन्यास लिएका दक्षिण अफ्रिकी विष्फोटक ब्याट्सम्यान एबी डिभिलियर्सको नाममा क्रिकेटका दुई ठूला विश्वरेकर्ड छन् । उनको नाममा वन डे अन्तर्राष्ट्रियमा सबैभन्दा छिटो अर्धशतक र सबैभन्दा छिटो शतक बनाउने विश्वरेकर्ड छ ।

१८ जनवरी २०१५ मा वेष्ट इण्डिजविरुद्धको वन डे अन्तर्राष्ट्रियमा एउटै खेलमा डिभिलियर्सले यी दुवै अविश्वसनीय रेकर्ड बनाउँदै क्रिकेट जगतमा चमत्कार गरेका थिए । यद्यपि यी विश्वरेकर्ड डिभिलियर्सले चाहेर नभइ उनले आफ्नो दायित्व पूरा गर्ने क्रममा संयोगले बनेको खेलेको छ । यो खेलमा दुवै ओपनरले शतक प्रहार गरिसकेका थिए । त्यसपछि राइली रुसो आउट भएपछि डिभिलियर्स ३ नम्बरमा ब्याटिङ गर्न आएर यो रेकर्ड बनाएका थिए ।

यो खेलमा डिभिलियर्सले १६ बलमै अर्धशतक पूरा गर्दै सबैभन्दा छिटो अर्धशतक बनाउने खेलाडी बनेका थिए । उनले श्रीलंकाका सनथ जयसूर्याको १७ बलमा अर्धशतकको रेकर्ड तोडेका थिए । यही खेलमा उनले ३१ बलमा शतक पूरा गर्दै यसअघिको न्यूजिल्याण्डका कोरी एण्डरसनको ३६ बलको शतकको रेकर्ड पनि तोडिदिएका थिए । तर रोचक संयोग के भने त्यतिबेला डिभिलियर्स आफू भने ३ नम्बरमा ब्याटिङ गर्न जान चाहेका थिएनन् ।

क्रिकेटसम्बन्धी वेबसाइट इएसपिएनक्रिकइन्फोसँग कुरा गर्दै दक्षिण अफ्रिकाका तीब्रगतिका बलर डेल स्टेनले यो खेलका नदेखिएका पक्षको खुलासा गरेका हुन् । स्टेनले भने ‘मलाई याद छ त्यतिबेला डिभिलियर्सले रसेल डोमिंगो (दक्षिण अफ्रिकी कोच) सँग ३ नम्बरमा डेभिड मिलरलाई ब्याटिङ गर्न पठाउन आग्रह गरेका थिए । डिभिलियर्सलाई त्यतिबेला आफूभन्दा मिलर बललाई बाउण्ड्रीबाहिर पुर्याउन सक्षम भएको लागेको थियो । तर कोच डोमिंगोको सोच भने फरक थियो त्यसैले उहाँले डिभिलियर्सलाई नै ब्याटिङको लागि पठाउनुभयो ।’

स्टेनका अनुसार त्यतिबेला डिभिलियर्स मन नलागी नलागी ब्याटिङ गर्न गएका थिए । स्टेनले अगाडि भने ‘वन्डर्सको स्टेडियममा ड्रेसिङ रुमबाट बाहिर निस्किँदा केही सिँढीहरु छन् । ब्याटिङका लागि क्रिजमा जानलाई दौडिएका डिभिलियर्स त्यहाँ सिँढीबाट लडेका थिए । यो दृश्य क्यामेरामा त आएन तर विश्वास गर्नुस् उनी मुखको भरमा पछारिएका थिए ।’

स्टेनका अनुसार यदि त्यो दिन कोच डोमिंगोले डिभिलियर्सको आग्रह मानेर उनको ठाउँमा डेभिड मिलरलाई ब्याटिङ गर्न पठाएको भए त्यो चमत्कार हुने थिएन । त्यो दिन गुलाबी जर्सीमा मैदानमा उत्रिएका डिभिलियर्सले सुरुदेखि नै आक्रामक खेल्दै क्रिकेटमा इतिहास रचेका थिए ।

Comments

comments