चार बर्षको अन्तरालपछि ए डिभिजन लिग फुटबल असोज १३ देखि आयोजना हुने




काठमाडौँ । चार वर्षको अन्तरालपछि असोज १३ गतेदेखि ए डिभिजन लिगको आयोजना हुनेभएको छ । अखिल नेपाल फुटबल संघ एन्फाले आइतबार पुरस्कार राशी र सुविधासहित लिगको मिति घोषणा गरेको हो ।

ए डिभिजन लिगको विजेताले ५० लाख पुरस्कार पाउनेछन् भने उक्त रकम गत संस्करणको भन्दा कम हो । पछिल्लो पटक २०७० सालमा भएको शहीद स्मारक ए डिभिजन लिगेको विजेताको ७५ लाख पुरस्कार पाएका थिए भने २ वर्षपछि आयोजना भएको राष्ट्रिय लिगको विजेताले १ करोड पुरस्कार पाएका थिए ।

५ करोड रुपैयाँको बजेटमा हुने खेलमा यसपटक पुरस्कार राशी घटाई प्रोत्साहन पुरस्कार बढाईएको छ । लिगको विजेताले ५० लाख रुपैयाँ पुरस्कार पाउनेछन् भने उपविजेताले ३५ लाख पाउनेछन् । यस्तै, तेस्रो हुनेले २५ लाख, चौथो हुनेले १५ लाख, पाँचौं हुनेले ७ लाख र छैटौं हुनेले ५ लाख पुरस्कार पाउनेछन् ।

यस्तै, ए डिभिजन लिगमा १४ टोलीहरुको सहभागिता रहनेछ । त्रिभुवन आर्मी, नेपाल पुलिस र एपीएफ गरी तीन बिभागीय, मनाङ, थ्रीस्टार, एनआरटी, सरस्वती, फ्रेण्ड्स, जावलाखेल, मछिन्द्र, संकटा, हिमालयन शेर्पा, च्यासल र व्रिगेड व्वाइज क्लव छन् ।

सातदोवाटोस्थित एन्फा कम्प्लेक्सको मैदान र हलचोकस्थित एपीएफको मैदानमा लिगका खेलहरु सञ्चालन हुनेछ । एन्फाका अनुसार रेलिगेशन हटाईए पनि अन्तिममा पर्ने टिमले अथवा १४औं हुनेले तयारी खर्चबापतको अन्तिम किस्तामध्ये ३ लाख गुमाउनेछ भने १३औं हुनेले २ लाख गुमाउनेछ । त्यस्तै अर्को लिगका लागि २ र १ अंक पनि गुमाउनेछ ।

Comments

comments