मेकअप नगरी किन आएकाे भन्ने जज भन्छिन्- मेराे बदनाम गर्न खाेजियाे ( हेर्नुस भिडियो )




काठमाडाैँ । मिस नेपाल २०१९ काे अडिसनमा सहभागी एक युवतीलाई मेकअप नगरी किन आएकाे भन्ने प्रश्न गरेर आलाेचना खेपिरहेकी निर्णायक (जज) रचना गुरुङले आफ्नाे बचाउ गरेकी छन् । उनले भिडियाे क्लिपका अन्य भाग हटाएर आफ्नाे उक्त बाेली मात्र देखिने गरी नियाेजित रुपमा बदनाम गर्ने उद्देश्यले भाइरल बनाइएकाे बताएकी छन् ।

मिस नेपालमा २५ वर्षदेखि आबद्ध गुरुङले आफूले कसैलाई हताेत्साहित पार्ने मनशाय नरहेकाे भन्दै कुराको प्रसंग नखुलाई अघिपछिको भाग काटेर आफूलाई नराम्रो देखाउन उक्त भिडियाे सार्वजनिक गराइएकाे बताएकी हुन् ।

मिस नेपालमा सहभागी हुन मेकअप नै नगरेर आएकी ललितपुरकी अस्मिता महर्जनलाई निर्यायक गुरुङले साे प्रश्न तेर्साइएकाे भिडियाे सामाजिक सञ्जालमार्फत भाइरल भइरहेकाे छ ।

भिडियाेमा देखिए अनुसार गुरुङले सहभागी महर्जनलाई प्रश्न सोध्छिन्, ‘तिमी किन मेकअप नगरी आयौ ?’ प्रतियोगीले जवाफ दिन्छिन्, ‘वास्तवमा मलाई मेकअप नै गर्न आउँदैन ।’

यसपछि निर्णायक गुरुङ रुखो आवाजमा भन्छिन्, ‘मेकअप गर्न नजान्ने भए किन मिस नेपालमा आएको ? अहिलेको एक्काइसौँ शताब्दीमा मेकअप नै गर्न नआउने मान्छे यहाँ भाग लिन आएर मिस नेपालको गरिमालाई कमजोर बनाउन खोजेको हाे ?’ उनकाे हाउभाउ नै उत्तेजक देखिन्छ । यसरी सहभागीलाई निरुत्साहित गर्ने उनकाे साे हर्कतकाे सर्वत्र आलाेचना भइरहेकाे छ ।

तर निर्णायक गुरुङ भने उत्कृष्ट २५ मा छानिएकी महर्जन देखेर आफूलाई गर्व लागेकाे बताउँछिन् । वास्तविक प्रसंग नराखी साे प्रश्न मात्र देखिनेगरी कसैले नियाेजित रुपमा आफ्नाे बदनाम गर्न भिडियाे सार्वजनिक गराएकाे उनकाे आराेप छ ।

हेर्नुहाेस् भिडियाे-

Comments

comments