आइएस प्रमुख बग्दादीको भिडियो सार्वजनिक, इराकमा पराजयको बदला श्रीलंकामा हमला !




बग्दाद, वैशाख १७ । इस्लामिक स्टेट (आइएस) समूहले हालै एक भिडियो सार्वजनिक गरेको छ । उक्त भिडियोमा देखिएका व्यक्ति अबु बकर अल बग्दादी रहेको दावी गरिएको छ ।

भिडियोमा बोलिरहेका व्यक्ति बग्दादी हुन् या होइनन् भन्ने स्वतन्त्र पुष्टि हुन सकेको छैन । यदि उनी बग्दादी नै हुन् भने विगत पाँच वर्षमा उनको यो पहिलो भिडियो हो ।

बग्दादीले सन् २०१४ मा पछिल्लो पटक भिडियो जारी गरेका थिए । त्यसयता सुरक्षा कारवाहीमा उनी घाइते भएको, मारिएको जस्ता चर्चा भए पनि उनको अवस्थाबारे जानकारी हुन सकेको थिएन ।

भिडियोमा इराकको बागुजमा आइएस पराजित भएको स्वीकार गरिएको छ । आइएसको अन्तिम गढ मानिएको बागुज आफूहरुको नियन्त्रणबाट गुमेको स्वीकार गर्दै उनले बागुजमा आइएसको पराजयको बदला लिन श्रीलंकामा हमला गरिएको बताएका छन् ।

१८ मिनेट लामो भिडियोमा उनले बागुजको युद्ध समाप्त भएको स्वीकार गरेका छन् । तर बागुजमा लडाई समाप्त भए पनि त्यसपछि हुने धेरै कुरा बाँकी रहेको बताएका छन् ।

आइएसको मिडिया नेटवर्क ‘अल फुरकान’ मा पोस्ट गरिएको सो भिडियो कहिले रेकर्ड गरिएको हो भन्ने प्रष्ट छैन । तर श्रीलंकामा गरिएका ताजा हमलाका बारेमा चर्चा गरिएका कारण उक्त भिडियो हालै रेकर्ड भएको अनुमान गरिएको छ ।

इराकबाट आइएस पराजित भएको भनिए पनि उसले अझै विश्वका विभिन्न मुलुकमा हमला गर्न सक्छ भन्ने सन्देश दिनका लागि उक्त भिडियो सार्वजनिक गरिएको हुन सक्ने विश्लेषकहरु बताउँछन् । (एजेन्सी)

Comments

comments