टी–२० मा नेपालको हालसम्मकै उत्कृष्ट वरियता, टेष्ट राष्ट्रभन्दा अब्बल




काठमाडौं, २० वैशाख । अन्तर्राष्ट्रिय क्रिकेट परिषद (आईसीसी) ले आज जारी गरेको नयाँ वरियता अनुसार नेपाल टी–२० तर्फ ११ औं स्थानमा रहन सफल भएको छ । नेपालको टी–२० मा यो हालसम्मकै उत्कृष्ट वरियता रहेको बुझिएको छ ।

युएई विरुद्धको टी–२० श्रृंखला जितेको नेपालले कुल १६९८ अंक हासिल गर्दै २१२ को रेटिङका साथ जिम्बाब्बे र आयरल्याण्डजस्तो टेष्ट राष्ट्रलाई उछिनेको छ । युएई विरुद्धको श्रृंखला नेपालले २–१ को अन्तरले जितेको थियो ।

जिम्बाब्बे १३ औं स्थानमा रहेको छ भने आयरल्याण्ड १५ औं स्थानमा छ । नेपालले ११ औं स्थानमा रहँदै आफ्ना चिर प्रतिद्वन्दीहरु स्कटल्याण्ड, नेदरल्याण्डस र युएईलाई उछिनेको थाहा भएको छ ।

टी–२० वरियताको शिर्ष स्थानमा पाकिस्तान रहेको छ । दक्षिण अफ्रिका र इंग्ल्याण्ड दोश्रो र तेश्रो स्थानमा रहेको छ भने भारत पाँचौ स्थानमा छ । त्यस्तै हिजो जारी भएको टेष्ट वरियता अनुसार भारत शिर्ष स्थानमा छ भने एकदिवसिय अन्तर्राष्ट्रियमा इंग्ल्याण्ड शिर्ष स्थानमा छ ।

Comments

comments