निर्मला हत्याकान्डः हिरासतमा यातना दिने पाँच प्रहरीविरुद्ध उजुर




कन्चनपुर, असार ६ । बलात्कारपछि हत्या गरिएकी कन्चनपुरकी १३ वर्षीया बालिका निर्मला पन्त हत्या प्रकरणमा पाँच प्रहरीविरुद्ध उजुरी दर्ता भएको छ । निर्मलाकान्डमा पक्राउ परेका भीमदत्त नगरपालिका–१८, सालघारीका १६ वर्षीय विशाल चौधरीले हिरासतका बेला आफूलाई यातना दिएको भन्दै तत्कालीन जिल्ला प्रहरी प्रमुख कुबेर कडायतलगायत अनुसन्धानमा खटिएका अरु चारजना प्रहरीविरुद्ध उजुरी दिएका हुन् ।

उजुरी पर्नेमा तत्कालीन कन्चनपुरका प्रमुख प्रहरी उपरीक्षक कुबेर कडायत, प्रहरी नायब निरीक्षक कृष्णराज ओझा, विशेष अनुसन्धानका लागि खटिएकी एसपी दुर्गासिंह चन्द र नाम नखुलाइएका अरु दुईजना प्रहरी रहेका छन् ।

चौधरीले बिहीबार नै जिल्ला प्रहरी कार्यालयमा उजुरी दर्ता गर्न खोजेपनि प्रहरीले मुद्दा दर्ता नमानेपछि शुक्रबार मुलुकी फौजदारी कार्यविधि संहिता २०७४ को दफा ५ को १ अन्तर्गत् सरकारी वकिलको कार्यालयमा निवेदन दिएका थिए ।

चौधरीको निवेदनअनुसार मुद्दा दर्ताका लागि जिल्ला प्रहरी कार्यालय पठाएको सरकारी वकिलको कार्यालयले जनाएको छ । गत मंसिर १९ गते पक्राउ परेका विशाललाई प्रहरीले १७ दिन हिरासतमा राखेर रिहा गरेको थियो ।

मदिरा सेवन गरी घरमा आगजनी, श्रीमतीको जलेर मृत्यु

नौगाड गाउँपालिका–२ सुण्डमुण्डुमा एक जनाले अत्यधिक मदिरा सेवन गरी आफ्नै घरमा आगजानी गरेका छन् । मदिरा सेवन गरी अन्दाजी ३२ वर्षीय शेरसिह बडालले घरमा आगो लगाएपछि सामान निकाल्न भित्र गएकी उनका श्रीमती ३० वर्षीया विमला बडालको घरभित्रै जलेर मृत्यु भएको छ ।

शनिबार राति १२ बजे मदिरा सेवन गरी घर पुगेका बडालले घर परिवारसँग झगडा गरेका थिए । घरमा आएर झगडा गरेपछि पूरै परिवार घर छाडेर जङ्गल भागेको नौगाड गाउँपालिका–२ का वडा सदस्य जयभानसिंह ठगुन्नाले बताए । घरमा कोही नभएको भन्दै बडालले आफू सुत्ने कोठामा गएर आगो सल्काएका थिए ।

घरमा आगो बलेको देखेपछि घर छाडेर भागेकाहरु फर्किएका थिए । बडालकी श्रीमती घरभित्रको सामान बाहिर निकाल्न भित्र पसेकी थिइन् । घरभित्रको सामान निकाल्ने क्रममा आगोमा जलेर उनको घटनास्थलमै मृत्यु भएको ठगुन्नाले बताए । आगो लागेको घर भित्रबाट बाहिर निस्कन नसक्दा उनको जलेर मृत्यु भएको हो । बुवा बहादुर बडाल र आमा मङ्गलीदेवी बडाल आगो निभाउने मान्छे खोज्न गाउँ पसेका थिए ।

घटनाको अवस्था बुझ्न प्रहरी नायब उपरीक्षक दीपेन्द्रबहादुर शाही घटनास्थल पुगेका छन् । आगो लगाएर परिवारको हत्या गरेको भए पनि के कति कारणले झैझगडा भयो, आगो लगाउने स्थितिसम्म कसरी पुगे भन्ने अनुसन्धानपछि खुल्ने प्रहरी नायब उपरीक्षक शाहीले बताए । आगो स्थानीयवासीले रातभर लगाएर नियन्त्रणमा लिएका छन् । मृतकको शव परीक्षणका लागि जिल्ला अस्पताल ल्याउने तयारी भइरहेको छ ।

Comments

comments