विश्वकपमा खराब प्रदर्शन गरेपछि बंगलादेशले प्रशिक्षक हटायो




ढाका : इङ्ल्यान्डमा जारी एकदिवसीय विश्वकप क्रिकेटमा बंगलादेशले खराब प्रदर्शन गरेपछि सोमबार बंगलादेशी क्रिकेट बोर्ड (बिसिबी) ले प्रमुख प्रशिक्षक स्टिभ रोड्सलाई जिम्मेवारीबाट हटाएको छ। बंगलादेशले तालिकाको आठौं स्थानमा रहँदै विश्वकप टुङ्ग्याएको थियो।

‘प्रमुख प्रशिक्षक स्टिभ रोड्सलाई बिदाइ गर्ने निर्णय गरेका छौं। निर्णय तत्कालै लागू हुन्छ,’ बिसिबीका प्रमुख कार्यकारी अधिकृत (सिइओ) निजामुद्दिन चौधरीले भने। प्रमुख प्रशिक्षको बिदाइको खबर टोली इङ्ल्यान्ड बसाइ सकेर फर्किएपछिको अर्को दिन आएको हो।

बंगलादेशले इङ्ल्यान्ड संस्करणको प्रतियोगिताका ९ मध्ये ३ खेलमा नतिजा निकाल्दा ५ खेलमा नतिजा सुम्पिएको थियो भने एक खेल वर्षाका कारण रद्द भएको थियो। बंगलादेशले दक्षिण अफ्रिका, वेस्ट इन्डिज र अफगानिस्तामाथि जित निकालेको थियो भने भारत, अस्ट्रेलिया र न्युजिल्यान्डजस्ता कठिन प्रतिद्वन्द्वीसँग प्रतिस्पर्धात्मक खेल प्रस्तुत गरेको थियो।

प्रमुख प्रशिक्षक रोड्सले अघिल्लो जुनमा बंगलादेशको टोली सम्हालेका थिए। विश्वकपअघि आयरल्यान्डमा भएको मल्टी टिम टुर्नामेन्टमा टोलीलाई पहिलो उपाधि दिलाउन सफल भएका थिए। बंगलादेशले रोड्सलाई अर्को वर्ष अस्ट्रेलियामा हुने ट्वान्टी–२० विश्वकपसम्मका लागि सम्झौता गरेको थियो। तर एकदिवसीय विश्वकप टोलीलाई राम्रो नतिजा दिलाउन नसकेको भन्दै बंगलादेश क्रिकेट बोर्डले सोमबार उनलाई बिदाइ गर्ने निर्णय गरेको हो।

Comments

comments