भारतलाई लाग्यो ठूलो झट्का, महत्वकाँक्षी चन्द्रयान–२ को प्रक्षेपण रोकियो




एजेन्सी । भारतीय अन्तरीक्ष अनुसन्धान संगठन (इसरो) ले प्राविधिक समस्याका कारण चन्द्रयान–२ को प्रक्षेपणलाई रोकेको छ । प्रक्षेपणको काउन्टडाउन सुरु गरिसकेको चन्द्रयान २ अन्तिम समयमा आएर रोकिएको हो ।

सामेबार विहान २ बजेर ५१ मिनेटमा चन्द्रयान–२ उडाउने समयतालिका थियो । तर उडानको लागि ५६ मिनेटमात्र बाँकी रहँदा ‘प्रक्षेपण वाहन प्रणाली’ मा प्राविधिक समस्या देखिएपछि सावधानी स्वरुप प्रक्षेपण अहिलेलाई रद्द गरिएको इसरो जनाएको छ ।

इसरो अर्को प्रक्षेपण मितिपछि घोषणा गर्ने बीबीसी हिन्दीले जनाएको छ । बिहान २ः५१ मा उड्ने योजना अनुरुप काउण्टडाउन भइरहेको अवस्थामा विहान १ः५५ मिनेटमा काउण्ट–डाउन रोकिएको हो ।

त्यसबेला काउण्ड–डाउन स्कृनमा ५६ मिनेट २४ सेकेण्ड बाँकी थियो । इसरोले प्रक्षेपण रद्द भएको आधिकारिक पुष्टि नगरेसम्म केही समय अनौलता छाएको थियो । यसअघि पनि जनवरी पहिलो हप्ता उडाउने योजना रहेको चन्द्रयान–२ लाई जुलाई १५ को लागि समय सारिएको थियो ।

चन्द्रयान–१ को सफलतापछि इसारोले चन्द्रयान–२ को योजना बनाएको थियो । ११ वर्ष अघि इसरोले सफलतापूर्वक पहिलो चन्द्र अभियान सम्पन्न गराएको थियो । ३१२ दिनसम्म चलेर चन्द्रमाको ३४ सय चक्कर लगाएपछि चन्द्रयान–१ ले सन् २००९ अगष्ट २९ मा काम गर्न छाडेको थियो ।

चन्द्रयान–२ लाई भने चन्द्रमाको सतहमा अवतरण गर्ने हिसाबले बनाइएको छ । ९ अर्ब ७८ करोड भारु लागतमा बनेको चन्द्रयान–२ चन्द्रमामा सफल अवतरण भएमा भारत चन्द्रमाको सतहमा यान उतार्ने रुस, अमेरिका र चीनपछि चौथो देश हुनेछ ।

चन्द्रयान–२ लाई चन्द्रमाको हालसम्म अपरिचित रहेको दक्षिणी ध्रुवमा अवतरण गराउने र त्यहाँको जानकारी बटुल्ने योजना छ । चन्द्रयान–२ भारतीय अन्तरिक्ष कार्यक्रमको लागि निक्कै महत्वपूर्ण मानिएको छ । भारतका राष्ट्रपति रामनाथ कोबिन्द स्वयम आईतबार श्री–हरिकोटामा रकेट प्रक्षेपण हेर्न पुगेका थिए ।

Comments

comments