दुखद खबर ! समयमै रगंशाला तयार नहुदा नेपाल र कुवेतको खेल स्थगित , भुटानमा हुन सक्ने




काठमाडौं : कतारमा हुने विश्वकप फुटबल २०२२ का लागि दोस्रो चरणको छनौटअन्तर्गत नेपाल र कुवेतबीच काठमाडौंमा हुने भनिएको खेल स्थगित गरिएको छ। एएफसीको निर्देशनमा अखिल नेपाल फुटबल संघ (एन्फा)ले मंसिर ३ गते काठमाडौंस्थित दशरथ रंगशालामा तय गरिएको खेल बिहीबार स्थगित गरेको हो।

नेपाल र कुवेतबीच काठमाडौंस्थित दशरथ रंगशालामा अखिल नेपाल फुटबल संघले फिफा र एएफसीसँग प्रस्ताव गरेको थियो। प्रस्तावपश्चात रंगशाला अवलोकनका लागि आएका एएफसी प्रतिनिधिले अन्तर्राष्ट्रिय मापदण्डअनुसार रंगशाला तयार नभएको निष्कर्ष निकालेपछि खेल स्थगित गरिएको एन्फाका प्रवक्ता किरण राईले जानकारी दिएका छन्।

उनका अनुसार एन्फाले सो खेल भुटानको चाङ्गलिमिथाङ्ग रंगशालामा सञ्चालन गर्न फिफा र एएफसीसँग प्रस्ताव गरिएको छ। एन्फाले भूकम्पबाट क्षतिग्रस्त एकमात्र अन्तर्राष्ट्रिय रंगशाला समयमै पुनर्निर्माण नहुँदा प्रतिष्ठित खेल गुमाउनुपरेको भन्दै क्षमायाचना समेत गरेको छ।

‘मापदन्ड पुगेन’

एसियाली फुटबल महासंघ (एएफसी)का प्रतियोगिता समितिका प्रतिनिधि देङ सिओ लोङले रंगशालाको निरीक्षण गरी बुझाएको प्रतिवेदनपछि फिफा र एएफसीले रंगशालालाई अयोग्य ठहर गर्दै एन्फालाई खेलस्थल परिवर्तन गर्न निर्देशन दिएको हो ।

एन्फा प्रवक्ता किरण राईले पूर्वाधारको मापदन्ड नपुगेको भन्दै खेल सार्न निर्देशन आएको बताए । उनले फिफा र एएफसीको निर्देशनअनुसार तटस्थस्थल भुटानको रंगशालाका लागि प्रस्ताव गरिएको पनि जानकारी दिए । विश्वकप छनोटको सो खेल आउँदो मंसिर ३ गते दशरथ रंगशालामा हुने तय थियो ।

मैदानकै अभावमा नेपालले विश्वकप छनोटका ‘अवे’ खेलहरु खेलिसकेको छ भने ‘होम’ खेल रंगशालामा खेल्नुपर्नेमा भुटान जानुपर्ने भएको हो । राष्ट्रिय खेलकुद परिषद् (राखेप)ले यही कात्तिक १५ गतेभित्रै आसन्न दक्षिण एसियाली खेलकुद (साग)को पूर्वाधार पूरा हुने दाबी गरिरहँदा मुख्य स्थल दशरथ रंगशाला पुनःनिर्माणमासमेत ढिलाइ भएको हो । साग भने मंसिर १५ देखि २४ गतेसम्म आयोजना हुँदैछ ।

Comments

comments