कप्तान रोहित शर्मा चम्किएपछि भारतले बंगलादेशलाई सजिलै हरायो




काठमाडौं । भारतीय क्रिकेट कप्तान रोहित शर्माले कप्तानी इनिङ खेल्दै भारतलाई जिताएका छन् । राजकोटस्थित सौरास्ट्र क्रिकेट एसोसिएसन रंगशालमा टस हारेर ब्याटिङका लागि निम्त्याइएको बङ्गलादेशले निर्धारित २० ओभरमा ६ विकेट गुमाएर १ सय ५३ रन बनाएको थियो।

१ सय ५४ रनको विजय लक्ष्यसहित जवाफी ब्याटिङमा उत्रिएको भारतले १५.४ ओभरमा मात्र दुई विकेट गुमाएर भारतले लक्ष्य पूरा गर्‍यो। घरेलु मैदानमा जित्नै पर्ने दबाबसहित मैदानमा उत्रिएको भारतलाई विजयी बनाउन शिखर धवनसँग ओपनिङमा आएका कप्तान रोहितले १ सय १८ रनको साझेदारी गर्दै ४३ बलमा ६ छक्का र ६ चौकासहित ८५ रन बनाए।

कप्तान रोहित अमिनुल इस्लामलले फालेको १३औं ओभरको दोस्रो बलमा मोहम्मद मिथुनको हातबाट क्याच आउट भएका थिए। २७ बल सामना गरेका धवनले ४ चौकासहित ३१ रन बनाएर अमिनुल इस्लामको बलमा बोल्ड आउट भए। त्यस्तै तेस्रो विकेटका लागि अविजित २९ रनको साझेदारी गरेका श्रेयस ऐयर र केएल राहुलले सम्हालिएर ब्याटिङ गर्दै टोलीलाई जिततर्फ डोर्‍याए।

ऐयरले १३ बलमा १ छक्का र ३ चौका प्रहार गर्दै २४ रनको योगदान गर्दा १० बलको सामना गरेका राहुलले ७ रन जोडे। यसअघि पहिलो इनिङमा ब्याटिङ गरेको बङ्गलादेशले उत्कृष्ट सुरुआतलाई निरन्तरता दिन सकेन। ओपनिङमा आएका लिटोन दास र मोहम्मद नइमले ६० रनको साझेदारी गर्दै उत्कृष्ट सुरुआत दिलाएका थिए।

दासले २१ बलमा ४ चौकासहित २९ तथा नइमले ३१ बलमा ५ चौकासहित ३६ रन जोडेका थिए। तेस्रो नम्बरमा ब्याटिङका लागि आएका सौम्य सरकारले २० बलमा २ चौका र १ छक्कासहित ३० रन बनाउनु बाहेक अन्य खेलाडीले दोहोरो संख्यामा रन बनाउन सकेनन्।

बलिङतर्फ भारतका लागि युजभेन्द्र चहलले २ तथा दीपक चहर, खलिल अहमद र वासिङ्टन सुन्दरले १-१ विकेट लिए। यसअघि आइतबार दिल्लीमा भएको पहिलो खेलमा बङ्गलादेशले भारतलाई ७ विकेटले पराजित गरेको थियो भने तेस्रो खेल नागपुरमा आइतबार हुनेछ।

Comments

comments