एमसीसीबिरुद्ध नेपालले दुई इनिङ्समा ८५ ओभरमात्र खेल्दा चर्को आलोचना




काठमाडौं, कात्तिक २२ । नेपाली राष्ट्रिय क्रिकेट टिमले इंग्ल्यान्डको मेरिलेबोन क्रिकेट क्लब (एमसीसी)सित प्रथम श्रेणी क्रिकेटमा लज्जास्पद हार व्यहोरेको छ । शुक्रबार कीर्तिपुरस्थित त्रिवि अन्तर्राष्ट्रिय क्रिकेट मैदानमा नेपाल २०८ रनको फराकिलो अन्तरले पराजित भएको हो ।

३९३ रनको चुनौती पछ्याएको नेपालले ४१ ओभरमा ‘अलआउट’ हुँदै १८४ रनमात्र बनाउन सक्यो । पहिलो इनिङ्समा ४४ ओभर ४ बलमात्र क्रिजमा टिकेर नेपालले १५३ रनमात्रै बनाएको थियो । दुवै इनिङ्समा नेपाली टिमका ब्याट्सम्यानहरु चल्न नसकेपछि बलरहरुले नै सर्वाधिक स्कोर जोडेका थिए ।

पहिलो इनिङ्समा सन्दीप लामिछानेले सर्वाधिक ३९ रन जोडे । दोस्रो इनिङ्समा सोमपाल कामीले नेपालका लागि सर्वाधिक ५१ रन बनाए । दोस्रो इनिङ्समा नवौं विकेटका लागि सोमपाल र सन्दीपबीच ५० रनको साझेदारी भयो । सोक्रममा सन्दीपले २५ रनको योगदान गरे ।

राष्ट्रिय टिमको कप्तानी सम्हालेका ज्ञानेन्द्र मल्लले भने पहिलो इनिङ्समा रनको खाता खोल्न सकेनन् । दोस्रो इनिङ्समा पनि ६ रनमात्रै जोडे । तीनदिने खेलमा दुई इनिङ्समा नेपालले ८५ ओभरमात्र खेल्दा चर्को आलोचना व्यहोरेको छ । यसअघि, पहिलो इनिङ्समा एमसीसीले अलआउट हुँदै ३६४ रन बनाएको थियो । दोस्रो इनिङ्समा एमसीसीले ६ विकेटको क्षतिमा १८६ रन बनाएर इनिङ्स समाप्ती गरेको थियो ।

यसअघि भएको एकदिवसीय क्रिकेटमा भने नेपालले ५ विकेटको जित हासिल गरेको थियो । नेपाल भ्रमणमा रहेको एमसीसीले अब शनिबार ट्वेन्टी–२० खेल खेल्ने कार्यक्रम छ । नेपाली क्रिकेट विकासका लागि तयार गरेको ‘लिगेसी टुर’अन्तर्गत् एमसीसीको टिम नेपाल आएको हो ।

Comments

comments