एक करोड पटक हेरिने पहिलो फिल्म बन्यो ‘छक्का पन्जा’


मनोरन्जन

काठमाडौं । नेपालका सिनेमा घरमा सय दिनसम्म प्रदर्शन भएको फिल्म ‘छक्का पन्जा’ले युटुबमा पनि नयाँ रेकर्ड बनाएको छ । हाइलाइट्स नेपालबाट सार्वजनिक भएको यो फिल्मलाई युटुबमा १ करोड पटक हेरिएको छ । युटुबमा १ करोड पटक हेरिने यो नै पहिलो नेपाली फिल्म हो ।

दीपाश्री निरौलाको निर्देशनमा तयार भएको यो फिल्मले गतबर्ष सर्वाधिक धेरै कमाइको रेकर्ड नै राखेको थियो । नेपाली बक्स अफिसमा १६ करोड भन्दा बढीको ग्रस कलेक्शन गरेको यो फिल्मले युटुबमा पनि नयाँ रेकर्ड बनाएको हो ।

साढे ५२ हजार दर्शकले यो फिल्मलाई युटुबमा लाइक गरेका छन् भने ७ हजार बढी दर्शकले डिसलाइक गरेका छन् । यो फिल्मको सिक्वेल ‘छक्का पन्जा २’ असोज ११ गतेबाट रिलिज हुँदैछ ।

फिल्ममा दीपकराज गिरी, प्रियंका कार्की, जीतु नेपाल, केदार घिमिरे, बर्षा राउत, नम्रता सापकोटा, वुद्धि तामाङ लगायतका कलाकारको मुख्य भूमिका थियो ।