यस्तो भयो राष्ट्रपति र प्रधानमन्त्रीको भाइटिका


Featured, समाचार

काठमाडौँ : राष्ट्रपति विद्यादेवी भण्डारीले बिहान ११ बजेर ५१ मिनेटको शुभसाइतमा आफ्ना भाइ डेगेन्द्र पाण्डेलाई टीका लगाइदिएकी छिन् । राष्ट्रपति निवास शीतलनिवासमा भएको भाइटीकाको कार्यक्रममा राष्ट्रपति भण्डारीले टिका लगाएर भाइलाई आशिर्वाद दिँदै कटुुस, ओखर र मिठाइ खुवाएर भ्रातृवात्सल्य प्रस्तुत गर्नुभयो । भाइ पाण्डेले दक्षिणा प्रदान गरेर उनीसंग आशीर्वाद लिए ।

कांग्रेस सभापति एवम् प्रधानमन्त्री शेरबहादुर देउवाले उत्तम साइतमै टीका लगाएका छन्। भाइटीकाको उत्तम साइत ११ बजेर ५१ मिनेटमा प्रधानमन्त्री देउवाले आफ्नै निवासमा बहिनी दुर्गा चन्दको हातबाट टीका ग्रहण गरेका हुन्।

देउवा तिहार मनाउन प्रधानमन्त्री निवास बालुवाटार छोडेर आफ्नै निवास बुढानिलकण्ठ पुगेका थिए। सातइमा टीका लगाउन नपाएका दाजुभाइ र दिदीबहिनीले शनिबार दिनभर टीका लगाइरहेका छन्। तिहारका दिन दिदीबहिनीले दाजुभाइलाई श्रद्धा, आस्था र निष्ठाका साथ दीर्घायु, आरोग्य र ऐश्वर्य प्राप्तिको कामना गर्दै पंचरंगी वा सप्तरङ्गी टीका लगाई मनाइँदैछ। भाइटीकामा दिदीबहिनीले दाजुभाइलाई टीका लगाएपछि दाजुभाइले पनि दिदीबहिनीलाई टीका लगाइदिने चलन छ।