ए डिभिजन लिगमा सरस्वतीले जोड्यो पहिलो एक अंक




काठमाडौं , शहीद स्मारक ए डिभिजन लिग फुटवलमा फ्रेन्ड्स क्लबले पहिलो जित हासिल गर्दा सरस्वती युथ क्लबले अंकको खाता खोलेको छ । आइतबार दशरथ रङ्गशालामा भएको पहिलो खेलमा उपाधि दावेदार थ्रीस्टार क्लबलाई १-० ले हराउँदै फ्रेन्ड्सले जारी लिगमा पहिलो जित हासिल गरेको हो ।

फ्रेन्ड्सलाई जिताउन खेलको १३ औं मिनेटमै ब्राजिलियन खेलाडी बाग्नेर डी कार्मोले निर्णायक गोल गरे । खेलमा थ्रीस्टारका केही गोल गर्ने अवसरलाई भने फ्रेन्ड्सका गोलकिपरले विफल बनाइदिएका थिए ।जायन्ट किलर बन्दै गएको फ्रेन्ड्सले चौथो चरणको खेलमा मनाङ्ग मस्र्याङदी क्लबलाई १/१ को बराबरीमा रोक्न सफल भएको थियो ।

आइतबार भएको दोस्रो खेलमा ब्रिगेड ब्वाइज क्लब बीबीसीलाई बराबरीमा रोक्दै सरस्वतीले अंकको खाता खोलेको हो । दशरथ रङ्गशालामै भएको खेल गोलरहित बराबरीमा सकिएको हो । यो खेलपछि लिग तालिकामा ६ खेलबाट १३ अंकसहित मच्छिन्द्र क्बल शीर्ष स्थानमा रहेको छ ।

त्रिभुवन आर्मी क्लब र मनाङ्ग समान १२ अंकसहित क्रमशः दोस्रो र तेस्रो स्थानमा छन् । चौथो स्थानको थ्रीस्टारको १० अंक छ । फ्रेन्ड्स क्लब ५ अंकसहित एघारौं स्थानमा पुगेको छ भने पुछारको सरस्वतीको १ अंक भएको छ । लिग अन्तर्गत सोमबार पनि दुई खेल हुनेछन् । मध्यान्ह १२ बजे न्यूरोड टिम एनआरटीले पुलिससंग तथा दिउँसो ३ बजे च्यासल युथ क्लबले सशस्त्र प्रहरीको एपिएफ्संग खेल्नेछ ।

Comments

comments