आईपिएल सुरु हुनु अगाडि नै राजस्थान रोयल्सलाई लाग्यो यति ठुलो झड्का


क्रिकेट

एजेन्सी – इंग्ल्यान्डका तीव्र गतिका बलर जोफ्रा आर्चरले आगामी संस्करणको इन्डियन प्रिमियर लिग (आइपिएल) गुमाउने भएका छन् । दायाँ हातको कुनाईको चोटको कारण आर्चरले श्रीलंकासँग मार्चमा हुने दुई टेष्ट र भारतमा हुने आईपीएल गुमाउने इंग्ल्यान्ड क्रिकेट बोर्डले जनाएको छ ।

आर्चर गत डिसेम्बरमा भएको दक्षिण अफ्रिकासँगको पहिलो टेष्टको क्रममा घाइते हुन पुगेका थिए । आर्चर राजस्थान रोयल्सबाट आइपिएल खेल्ने गर्दछन् । आधुनिक क्रिकेटमा वाउन्सर बलको राजा मानिने आर्चर नहुँदा इंग्ल्यान्ड र राजिस्थान रोयल्स दुबैलाई ठूलो धक्का लाग्ने अनुमान गरिएको छ ।

आर्चरलाई सन् २०१८ को अक्सनमा राजस्थानले ७.२० करोड भारतीय रुपैयाँमा अनुबन्ध गरेको थियो । गत जुलाईमा भएको एकदिवसिय विश्वकप इंग्ल्यान्डलाई पहिलो पटक विश्वकप जिताउन आर्चरले महत्वपूर्ण प्रर्दशन गरेका थिए । आर्चरले विश्वकपमा ११ खेलमा २० विकेट लिएका थिए भने फाइनलमा सुपर ओभरमा उत्कृष्ट प्रर्दशन गरेका थिए ।

आगामी संस्करणको आईपीएल चैत्र १६ देखि जेठ ११ (मार्च २९ देखि मे २४) सम्म भारतका विभिन्न शहरमा हुने छ । यस पटकको आईपिएलको उद्घाटन र फाइनल मुम्बईमा हुने छ ।

दिदी-बहिनी कप राष्ट्रिय महिला भलिबल भोलिबाट

महिलाको व्यवस्थापनमा मात्र पर्वत जिल्लाबाट सञ्चालनमा रहेको रेडियो दिदीबहिनीको आयोजनामा हुन लागेको चौथो दिदीबहिनी कप राष्ट्रिय महिला भलिबल प्रतियोगिताका खेलहरू फागुन ७ गते बुधबारबाट सुरु हुने भएका छन्। प्रतियोगितामा विभागीय टिमहरू नेपाल पुलिस क्लब, एपीएफ, त्रिभुवन आर्मी क्लब, न्यु डायमन्ड एकेडेमी र आयोजक दिदीबहिनीको टिम गरेर पाँच समूहका बीचमा प्रतिस्पर्धा हुने भएको छ।

प्रतियोगितामा विजेता बन्ने समूहले दुई लाख, दोस्रोले एक लाख र तेस्रोले पचास हजार नगद पाउने रेडियोकी अध्यक्ष कल्पना चापागाईँले बताइन्। अघिल्लो वर्षमा भएको तेस्रो संस्करणमा एपीएफ विजेता र पोखराको न्यु डायमन्ड एकेडेमी दोस्रो बनेका थिए। महोत्सवमा पालिकास्तरीय पुरुष भलिबल खेल प्रतियोगिता भने सम्पन्न भइसकेको छ।

साबिकको धौलागिरीका बागलुङ, पर्वत र म्याग्दी जिल्लाका आठ समूहका बीचमा भएको प्रतियोगितामा अनेरास्ववियू बागलुङको समूह विजेता र म्याग्दीको बेनी नगरपालिकाको समूह उपविजेता बनेका छन्। उनीहरूले क्रमशः एक लाख र पचास हजार रुपैयाँ नगद पुरस्कार पाएको भलिबल खेलका संयोजक शिव आचार्यले जानकारी दिए। रेडियोको हरेक वर्ष अन्तर्राष्ट्रिय महिला दिवसको अवसर पारेर गण्डकी प्रदेशस्तरीय महिला महोत्सवको आयोजना गर्दै आएको छ। यस वर्ष पनि रेडियोको दसौँ वार्षिकोत्सव तथा १ सय १० औँ अन्तर्राष्ट्रिय महिला दिवसको अवसर पारेर महोत्सवको आयोजना गरिएको हो।