संक्रमित गर्भवती महिलाबाट कोरोना भाइरस बच्चामा सर्दैन




काठमाडौं : कोरोना भाइरसबाट संक्रमित गर्भवती महिलाबाट जन्मेको बच्चामा भाइरसको संक्रमण नहुने देखिएको छ । चिनियाँ–अमेरिकी अनुसन्धानकर्ताको टोलीले संक्रमित गर्भवती महिलाबाट जन्मेको बच्चामा भाइरसको संक्रमण नहुने तथ्य पत्ता लगाएको हो ।

चिनियाँ जर्नल ‘फ्रन्टियर्स इन पेडियाट्रिक्स जर्नल’ मा प्रकाशित गरिएको अध्ययन प्रतिवेदनमा ‘ह्वान्झोङ युनिभर्सिटी अफ साइन्स एन्ड टेक्नोलोजी’ तथा वुहान विश्वविद्यालयका अमेरिकी तथा चिनियाँ अध्ययनकर्ताहरूको पनि संलग्नता रहेको थियो ।

‘द लन्सेट जर्नल’ मा पनि प्रकाशित अध्ययनमा अनुसन्धानकर्ताले भाइरस संक्रमित आमाले बच्चा जन्माउँदा त्यसको संक्रमण शिशुमा नदेखिएको पुष्टि गरिएको छ । अध्ययनमा वुहानस्थित युनियन अस्पतालमा बच्चालाई जन्म दिएका कोरोना भाइरसबाट संक्रमित चार जना गर्भवती महिलामा गरिएको थियो ।

जन्मिएका चार बच्चामध्ये ३ जनामा कोरोना भाइरसको संक्रमण परीक्षण गरिएको थियो तर एक बच्चामा आमाको अनुमति नहुनाले परीक्षण गरिएको थिएन । अध्ययनका क्रममा जन्मिएका सबै शिशुलाई एनआइसियुमा राखिएपनि कुनै पनि बच्चामा कोरोना भाइरस संक्रमणको लक्षण भने देखिएको थिएन ।

अध्ययनमा एउटा बच्चामा तीन दिनसम्म श्वास प्रश्वाससम्बन्धी समस्या र अर्को एक बच्चामा केही दागहरू देखिएको थियो । तर, ती दाग र स्वास्थ्य समस्या आफैँ समाधान भए । अहिले अध्ययन गरिएका चारवटै बच्चा र आमा पनि पूर्ण रूपमा स्वस्थ भइसकेका छन् ।

Comments

comments