बीसीसीआईका अध्यक्ष सौरभ गांगुलीले भने ‘यसपटकको आईपीएल बिर्सिदिनुस्’


क्रिकेट

काठमाडौं, २ वैशाख । एजेन्सी । १३औं संस्करणको इन्डियन प्रिमियर लिग (आईपीएल) को विषयमा भारतीय क्रिकेट कन्ट्रोल बोर्ड (बीसीसीआई) ले छिटै केही फैसला लिनेछ । को रो नाकै कारण विश्वका ठूला खेल प्रतियोगिताहरू स्थगित भइसकेका छन् । यस्तो अवस्थामा आईपीएल आयोजना कसरी हुनसक्छ भन्ने सबैको मनमा प्रश्न उठेको छ । अहिले भारतमा लकडाउन चलिरहेको छ र ३० अप्रिलसम्म लम्ब्याउने तयारीसमेत भइरहेको छ ।

बीसीसीआईका अध्यक्ष सौरभ गांगुलीले यस संस्करणको आईपीएलको विषयमा यस्तो अवस्थामा केही बोल्न नसकिने बताएका छन् । उनले यस अवस्थामा आईपीएल हुन मुस्किल रहेको बताएका छन् । “हामी परिस्थितिलाई कुरेर बसेका छौं । यस अवस्थामा हामी केही भन्ने सक्ने अवस्थामा छैनौं,” बीसीसीआईका अध्यक्ष गांगुलीले भने, “एयरपोर्ट बन्द छन् । खेलाडी घरको बन्द कोठामा छन् । मलाई लाग्दै छ कि मेको अन्त्यसम्म यस्तै हुन सक्नेछ ।”

बन्दका कारण खेलाडी देश आउन नसक्ने भएकाले खेलाडी विनाप्रतियोगिताको आयोजना गर्न नसकिने उनको भनाइ छ । “टिमका लागि खेलाडी कहाँबाट ल्याउने । जसका लागि एयरपोर्ट बन्छ । विश्वभर सबै खेल गतिविधि स्थगित गरिएका छन । त्यसैले आईपीएल बिर्सिदिनुस्,” अध्यक्ष गांगुलीले भने । उनले सोमबार आधिकारिसँग बैठक बसेपछि मात्रै स्थिति प्रस्ट हुने जानकारी दिएका छन् । उनले विश्वमा मानिसको जीवनशैली ठप्प भएका बेला खेलको भविष्य अनिश्चित हुने बताएका छन् । उनले मेमा पनि आईपीएल नहुने सक्ने बताए ।