युभेन्टसको जीतमा रोनाल्डोले रचे नयाँ कीर्तिमान




Loading...

एजेन्सी, ९ असार । इटालियन सिरी ए अन्तर्गत सोमबार राती युभेन्टस् को जीतमा एक गोल गरेपछि पोर्चुगिज फरवार्ड क्रिस्टियानो रोनाल्डोले नयाँ कीर्तिमान रचेका छन् । गएराति बोलोग्नासँग उसैको घरेलु मैदानमा भएको खेलमा युभेट्सले २-० को जीत दर्ता गरेको थियो जसमा रोनाल्डोले १ र अर्जेन्टिनी युवा खेलाडी पउलो डिबालाले १ गोल गरेका थिए । खेलका दुवै गोल पहिलो हाफमा भएका थिए ।

रोनाल्डोले २३औं मिनेटमा पेनाल्टी मार्फत गोल गर्दै युभेन्ट्सलाई अग्रता दिलाएका थिए । जारी लिग सिजनमा यो रोनाल्डोको २२ औं गोल थियो । उनले गत सिजन कुल २१ गोल गरेका थिए । रोनाल्डोले दुई सिजनमा कुल ४३ गोल गर्दै इटालीको शीर्ष श्रेणी लिगमा सर्वाधिक गोल गर्ने पोर्चुगिज खेलाडी बनेका छन् । यसअघि उक्त कीर्तिमान रुइ कोस्टाको नाममा रहेको थियो । कोस्टाले सिरी ए मा ८ वर्ष बिताउँदै फिओरेन्टिना र एसी मिलानबाट खेलेका थिए ।

रोनाल्डो प्रिमियर लिगमा पनि सर्वाधिक गोल गर्ने पोर्चुगिज खेलाडी हुन् । ६ वर्ष इंग्लिस क्लब म्यानचेस्टर युनाइटेडमा बिताएका उनले १ सय ९६ खेलमा ८४ गोल गरेका थिए । रोनाल्डो स्पेनिस ला लिगामा पनि सर्वाधिक गोल गर्ने पोर्चुगिज खेलाडी हुन् । रियाल मड्रिडका समेत सर्वाधिक गोलकर्ता रहेका रोनाल्डोले ९ वर्ष मड्रिडबाट खेल्दा २ सय ९२ खेलमा ३ सय ११ गोल गरेका छन् । स्पेनिस लिगमा भने समग्रमा लियोनेल मेस्सीले मात्र रोनाल्डोभन्दा बढी गोल गरेका छन् ।

Comments

comments