पाकिस्तानका यी ३ क्रिकेट खेलाडीमा कोरोना संक्रमण


क्रिकेट

एजेन्सी, ९ असार । इंग्ल्याण्ड भ्रमणमा जानुपूर्व पाकिस्तानका ३ खेलाडीमा कोरोना संक्रमण पुष्टि भएको छ । पाकिस्तान क्रिकेट बोर्डका अनुसार इंग्ल्याण्ड भ्रमणमा जाने टोलीको सदस्य रहेका शादाब खान, हैदर अली र ह्यारिस राउफमा कोरोना पुष्टि भएको हो ।

रावलपिण्डीमा आइतबार परीक्षण गरिनुपूर्व उनीहरुमा कुनै लक्षण नदेखिएको पनि बोर्डले जनाएको छ । बोर्ड कराँची, लाहोर र पेशावरमा गरिएको अन्य खेलाडीहरुको टेस्टको नतिजाको पर्खाइमा रहेको छ । बोर्डले जारी गरेको विज्ञप्तिमा लेखिएको छ, ‘संक्रमण पुष्टि हुने तीनजनालाई नै सेल्फ आइसोलेसनमा जान मेडिकल प्यानलले सुझाव दिसकेको छ ।’

त्यसैगरी रावलपिण्डीमै परीक्षण गरिएको अन्य दुई खेलाडी इमाद वासिम र उस्मान शिनवारीको भने रिपोर्ट नेगेटिभ आएको र उनीहरु जुन २४ मा लाहोरका लागि प्रस्थान गर्नेछन् । हैदर अली अघिल्लो वर्ष पाकिस्तानको अन्डर-१९ टोलीको सदस्य रहेका थिए र हालसालै उनलाइ टेस्ट र टि-ट्वान्टीको २९ सदस्यीय टोलीमा पनि पहिलोपटक समावेश गरिएको छ ।

त्यसैगरी, अष्ट्रेलियन बिग ब्यासमा उत्कृष्ट प्रदर्शन गरेका राउफले २ टि-ट्वान्टी अन्तर्राष्ट्रिय खेलेका छन् भने शादाव खान यी ३ मध्येकै सबभन्दा अनुभवी खेलाडी हुन् जसले ८८ अन्तर्राष्ट्रिय खेल खेलिसकेका छन् । पाकिस्तानले इंग्ल्याण्ड विरुद्ध पहिलो टेस्ट लर्डस् मा खेल्दै छ र बाँकी दुइ टेस्ट म्यानचेष्टर र नटिङ्घाममा हुनेछ । त्यसैगरी लिड्स, कार्डिफ र साउथह्याम्पटनमा ३ टिट्वान्टी खेलिनेछन् ।

Comments

comments