नेपाली मूलकी फुटबलर स्नेहा लिम्बु भन्छिन्- बार्सिलोनाबाट खेल्ने लक्ष्य छ


खेलकुद

काठमाडौँ। हङकङमा जन्मिएकी नेपाली मूलकी फरवार्ड स्नेहा लिम्बु हङकङको यु-१८ टिमबाट खेल्छिन्। १६ वर्षीया स्नेहा हङकङको पहिलो डिभिजनको क्लब सिटिजन एफसीको पहिलो रोजाइकी फरवार्ड समेत हुन्। कम उमेरमै क्षमता देखाएकी स्नेहालाई हङकङ महिला टिमको भविष्यको रुपमा हेरिएको छ।

आफ्ना बुबाको प्रेरणाका कारण स्नेहा फुटलतर्फ आकर्षित भएकी हुन्। ‘हाम्रो लागि फुटबलले धेरै अर्थ राख्छ। मेरो बुबा बाल्यकालमा फुटबल खेल्नुहुन्थ्यो। तर उहाँ घाइते हुनु भयो। त्यो बेला नेपालमा उहाँले सहयोग पाउनु भएन। त्यसैले उहाँले आफूले गर्न नसकेको कुरा हामीले गर्न खोज्यौ भने सहयोग गर्छु भन्नु हुन्थ्यो,’ स्नेहालाई उधृत गर्दै साउथ चाइना मर्निङ पोस्टले लेखेको छ। स्कुल पढ्दा फुटबलमा प्रवेश गरेकी स्नेहा पहिलो पटक हङकङको यु-१४ टिममा परेकी थिइन्।

फुटबल खेल्न सहयोग गर्ने बताएका उनका बुबाले सुरुमा भने फुटबल खेल्ने उनको प्रस्ताव विश्वास गरेका थिएनन्। ‘सुरुमा बुबाले ममाथि विश्वास गर्नु भएन। त्यसैले मैले मेरो स्कुलका प्रशिक्षकलाई भन्नु परेको थियो। उहाँले बुबालाई बोलाएर मैले फुटबल खेल्ने कुरा बताउनु भयो। त्यसपछि बुबा खुसी हुनु भयो,’ उनले भनेकी छिन्,’राष्ट्रिय टिमबाट खेल्दा निकै राम्रो लाग्छ। म राष्ट्रिय टिमका लागि केहि उपलब्धि दिलाउन चाहान्छु। जस्तो एसियन गेम्स वा अरु ठूला प्रतियोगिता जित्न चाहान्छु।’

सुरुमा स्कुलमा उनले फाइभ ए साइड फुटबल प्रतियोगिता खेलेकी थिइन्। त्यति बेला देखि नै उनी ब्राजिलियन फरवार्ड नेइमारकी फ्यान थिइन्। ‘नेइमारले खेल्ने शैलीको ठूलो फ्यान हुँ। जब उसले आफ्नो कला देखाउँछ, गोलका लागि पास दिन्छ र अरु धेरै थोक गर्छ मेरो उत्साह र खुसी बढ्छ। धेरै खेलाडीले त्यस्तो गर्न सक्दैन। तर नेइमारले गर्न सक्छ,’ उनी भन्छिन्।

फुटबलमा करिअर बनाउने लक्ष्य राखेकी स्नेहा विश्व स्तरिय क्लबबाट खेल्न चाहन्छिन्। ‘मेरो अहिलेको सिजनको लक्ष्य लिगको उपाधि जित्ने हो। राष्ट्रिय टिमका लागि कडा परिश्रम गरेर उत्कृष्ट खेल्नु हो। हामी जित्न मात्र चाहादैनौ टिमको प्रदर्शनमा पनि सुधार ल्याउन चाहान्छौं। यस्तै म स्पेनिस क्लब बार्सिलोना वा अरु विश्वस्तरिय क्लबबाट खेल्न चाहान्छु,’ उनको भनाइ छ।

Comments

comments