काठमाडौं उपत्यकामा फेरि लकडाउन गर्ने तयारी


समाचार

काठमाडौं– कोरोना संक्रमण तिब्र फैलिन थालेपछि काठमाडौं उपत्यकामा फेरि कडा खालको लक डाउन गर्ने सरकारले तयारी गरेको छ । उपत्यकामा पछिल्ला केहिदिनदेखि एकाएक संक्रमित बढेपछि महामारीको ‘इपिसेन्टर’ बन्ने खतरा भएको भन्दै यस्तो तयारी गरिएको स्रोतले जनाएको छ ।

सरकारले गत ११ चैतदेखि घोषणा गरेको लकडाउन ६ साउनबाट अन्त्य गरेको थियो । हाल बजार, छोटो दूरीका सार्वजनिक यातायात, उद्योग, कलकारखाना र सरकारी कार्यालय खुलेका छन् । लकडाउन खुलेसँगै मानिसहरुमा सचेतनाको पक्ष कमजोर देखिँदा संक्रमणको जोखिम उच्च भएको छ । पछिल्लो समय उपत्यकामा दैनिक ५० जना हाराहारीमा संक्रमित देखिन थालेका छन् ।

स्रोतका अनुसार प्रधानमन्त्री केपी ओलीले अबका केहिदिनको संक्रमितको अवस्था हेरेर पुनः लकडाउन गर्नुपर्ने मनस्थितिमा पुगेका छन् । उच्च सरकारी अधिकारीहरुले पनि लकडाउन फेरि लकडाउन गर्नुपर्ने अवस्था आउन सक्ने भएकाले तयारी गर्दै गर्नुपर्ने सुझाव प्रधानमन्त्री कार्यालय र कोभिड–१९ संकट व्यवस्थापन केन्द्र (सीसीएमसी) मा दिन थालेका छन् ।

सरकारले परिक्षण घटाएको र जनताले सचेतना अपनाउन नसकेको अवस्थामा सबैतिरबाट लकडाउन गर्नुपर्ने सुझावहरू आएको बताइएको छ । कतिपय विज्ञहरूले काठमाडौं उपत्यकामा कोरोना संक्रमण भुसको आगो जस्तै फैलिएको र सरकारले परिक्षणमा उदासिनता देखाएको आरोप लगाइरहेका छन् ।

बिहिबार मात्रै काठमाडौं उपत्यकाका आठ स्थानमा संक्रमित भेटिएका छन् । अन्य जिल्लाबाट काठमाडौं आउनेहरूको संख्या एकदमै उच्च बनेको छ । सडक पेटीदेखि पसल =सम्म मानिसको भिड लागिरहेको छ । धेरैजसो मानिसले सामाजिक दूरी समेत कायम गरेका छैनन् । कतिपयले मस्क समेत नलगाई निर्वाध हिंडिरहेका छन् । बिहीबार मात्र अन्य जिल्लाबाट उपत्यका प्रवेश गरेकामध्ये २४ जनामा कोरोना पोजेटिभ देखिएको थियो ।