प्रधिकरणमा कुलमानको स्थानमा आउने लेखनाथ कोइराला को हुन् ?


समाचार

काठमाडौं : सरकारले नेपाल विद्युत् प्राधिकरणका निमित्त कार्यकारी निर्देशकको जिम्मेवारी उपकार्यकारी निर्देशक लेखनाथ कोइरालालाई दिएको छ। ऊर्जा, जलस्रोत तथा सिँचाइमन्त्री वर्षमान पुनले आज मन्त्रिस्तरीय निर्णय गरी कोइरालालाई निमित्त कार्यकारी निर्देशकको जिम्मेवारी दिएका हुन्। प्राधिकरणमा कार्यरत उपकार्यकारी निर्देशकमध्ये कोइराला सबैभन्दा वरिष्ठ हुन।

वरिष्ठतालाई समेत ख्याल गरेर मंगलबार मन्त्रिस्तरीय निर्णयबाट उपकार्यकारी निर्देशक कोइरालालाई प्राधिकरणको निमित्त कार्यकारी निर्देशकको जिम्मेवारी दिइएको मन्त्री पुनका प्रेस संयोजक दयानिधि भट्टले जानकारी दिए। अर्को व्यवस्था नहुन्जेलका लागि कोइरालालाई प्राधिकरणको दैनिक कामकाज सम्हाल्ने गरी जिम्मेवारी तोकिएको हो। मन्त्री पुन प्राधिकरण सञ्चालक समितिका अध्यक्षसमेत हुन।

को हुन् कोइराला ?

विसं २०२० मा भोजपुरमा जन्मिएका लेखनाथ कोइरालाले २०४५ सालमा सहायक लेखा अधिकृतका रुपमा विद्युत प्राधिकरणमा सेवा सुरु गरेका थिए । उनी चार्टर्ड अकाउन्टेन्ट (सीए) पनि हुन् । प्राधिकरणले नै आफ्ना कर्मचारीहरुमध्येबाट मनोनयन गरेर उनलाई चार्टर्ड अकाउन्टेन्ट अध्ययनका लागि पठाएको थियो । कोइरालाले भारतको इन्स्टिच्युट अफ चार्टर्ड अकाउन्टेन्ट्स (आइसीएआई) बाट २०६४ सालमा सीए कोर्स पूरा गरेका थिए । त्यसअघि उनले २०४८ सालमा त्रिभुवन विश्वविद्यालयबाट एमबीए पनि गरेका थिए ।

कोइराला प्राधिकरणका तर्फबाट चिलिमे जलविद्युत, माथिल्लो तामाकोशी तनहुँ हाइड्रोपावर मध्य भोटेकोशी हाइड्रोपावर र पावर ट्रान्समिसन कम्पनी (४०० केभी) लगायत प्राधिकरणका सहायक कम्पनीहरुमा संचालक समित सदस्य पनि छन् ।