आईपिएल खेल्न युएई पुगेका सन्दिप लामिछानेलाई क्वारेन्टाईनमा राखियो


क्रिकेट

काठमाडौं, भदौ ३० । नेपाली राष्ट्रिय क्रिकेट टोलीका खेलाडी सन्दीप लामिछाने यूएई पुगेका छन् । क्यारेबियन प्रिमियर लिग (सीपीएल)मा सहभागिता जनाएर इन्डियन प्रिमियर लिग (आईपीएल) ट्वेन्टी-२० क्रिकेट खेल्न सन्दीप यूएई पुगेका हुन् ।

दिल्ली क्यापिटल्सबाट आईपीएल खेलिरहेका सन्दीप आइतबार राति यूएई पुगेर ‘क्वारेन्टिन’मा बसिरहेको सामाजिक सञ्जाल ट्वीटरमार्फत् जानकारी दिएका छन् । दिल्लीले सन्दीपलाई ‘हेर उनी आए’ क्याप्सन लेखेर ट्वीटरमार्फत् जानकारी दिएको छ ।

कोरोनाभाइरसको महामारीका कारण ढिलागरी आईपीएलको १३औं संस्करण भारतको सट्टा यूएईमा आउँदो शनिबारदेखि सुरु हुँदैछ । दिल्लीले पहिलो खेलमा किंग्स इलाभेन पञ्जाबसँग आउँदो आइतबार खेल्नेछ । उक्त खेलमा सन्दीप सहभागी हुने सम्भावना कम रहेको छ । जमैका तलाबाजबाट सीपीएलमा खेलेका सन्दीपले सबै खेलमा मैदानमा उत्रिएर ११ खेलमा १२ विकेट लिएका थिए ।