ललितको उपचार गर्न सहयोग उठाउदै क्रिकेट खेलाडी संघ


क्रिकेट

काठमाडौं। क्रिकेट खेलाडी संघ नेपाल (सिप्यान) ले दुर्घटनामा घाइते भएका राष्‍ट्रिय क्रिकेटर ललित सिंह भण्डारीको उपचारमा सहयोग गर्न अपील गरेको छ।

अध्यक्ष डा. मनिषराज पाण्डे र महासचिव पारस खड्काको संयुक्त हस्ताक्षरमा जारी प्रेस वक्तव्यमा भण्डारीको उपचारमा सहयोग गर्न आग्रह गरिएको हो। सहयोग गर्न इच्छुकहरूले पुतलीसडकस्थित क्रिकेट प्लेयर्स एशोसिएशनको नाममा रहेको सेञ्‍चुरी कमर्सियल बैंकको ००१०००२५२९ सीए नम्बर खातामा रकम जम्मा गर्नसक्ने विज्ञप्तिमा उल्लेख छ।

आइतबार साँझ कञ्‍चनपुरमा मिनीट्रकको ठक्करबाट घाइते भएका क्रिकेटर भण्डारीको अहिले काठमाडौंको ग्राण्डी इन्टरनेशनल अस्पतालमा उपचार भइरहेको छ। भण्डारी अहिले खतरामुक्त रहेको संघको विज्ञप्तिमा लेखिएको छ।