बधाई ! क्रिकेटर ललितसिंह भण्डारीको शल्यक्रिया सफल


क्रिकेट

काठमाडौं– नेपाली राष्ट्रिय क्रिकेट टिमका खेलाडी ललितसिंह भण्डारीको सफल शल्यक्रिया भएको छ। क्रिकेट खेलाडी संघ नेपाल (सिप्यान) ले प्रेस विज्ञप्ति निकाल्दै ग्राण्डी अन्तर्राष्ट्रिय अस्पतालमा मुख्य चोटको सफल शल्यक्रिया भएको जानकारी दिएको हो। डाक्टर चक्रराज पाण्डेको टिमले दुर्घटनामा परी घाइते भएका ललितको शल्यक्रिया गरेका थिए।

आइतबार कञ्चनपुरमा से १ ख १३२४ नम्बरको ट्रकसँग ललितले चलाई रहेको म २ प ४७०५ नम्बरको मोटरसाइकल ठोकिँदा उनी गम्भिर घाइते भएका थिए। तत्काल धनगढीमा सामान्य उपचारपछि उनलाई नेपालगञ्ज मेडिकल कलेजमा लगिएको थियो। उनलाई थप उपचारको लागि सिम्रिक एयरबाट सोमबार काठमाडौंको ग्राण्डी अन्तर्राष्ट्रिय अस्पतालमा ल्याइएको थियो।

बुधबार राष्ट्रिय खेलकुद परिषद् (राखेप) का सदस्यसचिव रमेश सिलवालले अस्पतालमा ललितलाई भेट्दै उपाचारको सम्पूर्ण सहयोग राखेपले गर्ने बताएका थिए। त्यस्तै, सिप्यानले ललितलाई आर्थिक सहयोग गर्न अभियान नै चलाएको छ। सबै क्रिकेट शुभचिन्तकलाई हार्दिक अपिल गर्दै सहयोग गर्न चाहनेले क्रिकेट प्लेयर्स एसोसिएसन नेपालको नाममा सेन्चुरी बैकमा रहेको खाता नम्बर ००१०००२५२९ CA मा जम्मा गर्न सक्नुहुनेछ भन्दै सिप्यानले विज्ञप्ति निकालेको थियो।