कलाकार हरिवंश आचार्य र उनकी पत्नीलाई कोरोना संक्रमण पुष्टि


मनोरन्जन

काठमाडौं । वरिष्ठ हास्यकलाकार हरिवंश आचार्य र उनकी पत्नी रमिला आचार्यलाई कोरोनाभाइरस संक्रमण पुष्टि भएको छ । सामान्य लक्षण देखिएपछि गरिएको पीसीआर परीक्षणमा कोरोना पोजेटिभ देखिएको हरिवंशले जानकारी दिए । सोमबार दिएको स्वाबको मंगलबार पोजेटिभ रिपोर्ट आएको उनले बताए ।

साथै हरिवंशले आफूहरुको अहिले स्वास्थ्य अवस्था सामान्य रहेको जानकारी दिएका छन् । आफूहरुको सम्पर्कमा आएकाहरुलाई होम आइसोलेसनमा बस्न र कोरोना परीक्षण गराउन उनले आग्रह गरेका छन् ।

यसबारे जानकारी दिँदै उनले फेसबुकमा लेखेका छन् :

सामान्य लक्षण देखिएकोले हिंजो मेरो र मेरो श्रीमती रमिलाको पीसीआर गरेका थियौं । हामी दुवै जनाको कोरोना संक्रमण पुष्टि भएको रिपोर्ट आज आयो । हाम्रो स्वास्थ्य अवस्था सामान्य छ। हामीसँग सम्पर्कमा रहनुभएका सम्पूर्ण महानुभावहरुले होम आइसोलेसनमा बसेर निर्धारित समयमा परीक्षण गराउनुहोला।

यहाँहरुको माया, आशिर्बाद र शुभेच्छाको कारण हामीले छिट्टै कोरोना संक्रमणलाई जित्ने छौं । कोरोना संक्रमण ब्यापक रुपमा फैलिएको हुँदा यहाँहरु सबैले जनस्वास्थ्यका मापदण्ड अनिबार्य रुपमा अबलम्बन गर्नुहुन अनुरोध गर्दछौं ।