बेन्चमै सन्दिपको आईपिएल केरियर सकिने खतरा, आज पनि दिल्लीले सन्दिपलाई खेलाएन


क्रिकेट

काठमाडौँ । इण्डियन प्रिमियर लिग (आईपीएल) को जारी खेलमा चेन्नाइ सुपर किंग्सले दिल्ली क्यापिटल्सलाई १८० रनको लक्ष्य प्रस्तुत गरेको छ। शारजाह क्रिकेट स्टेडियममा टस जितेर ब्याटिङमा उत्रिएको चेन्नाइले निर्धारित २० ओभरमा ४ विकेट गुमाउँदै १७९ रन बनाएको हो।

चेन्नाइका लागि फाफ डुप्लिसिसले सर्वाधिक ५८ रन बनाउँदा अम्बाती रायडूले ४५ रन जोडे। सेन वाटसनले ३६ रन जोड्दा रवीन्द्र जडेजाले आक्रामक ३३ रन बनाए। दिल्लीका लागि एनरिच नोर्टजेले २ विकेट लिँदा तुसार देशपाण्डे र कागिसो रावाडाले १/१ विकेट लिए।

दिल्ली क्यापिटल्सले आफ्नो नवौं खेलमा पनि नेपाली लेग स्पिनर सन्दीप लामिछानेलाई बेन्चमै राखेको छ । सारजाह क्रिकेट स्टेडियममा चेन्नई सुपर किङ्सविरुद्धको जारी खेलामा दिल्लीले सन्दीपलाई मौका दिएन । चेन्नईले टस जितेर पहिले ब्याटिङ रोजेपछि दिल्लीले पहिले बलिङ गरिरहेको छ ।

दिल्लीले चेन्नईविरुद्धको खेलका लागि सन्दीपलाई प्लेईङ सेटमा अटाउन सकेनन् । तेस्रो पटक आईपीएल खेलिरहेका सन्दीप लगातार नवौं खेलमा बेन्चमै छन् । दिल्ली ८ खेलमा ६ जितसहित १२ अंक जोडेर अंकतालिकामा दोस्रो स्थानमा छ ।

चेन्नईलाई हराएर शीर्ष स्थानमा उक्लने दिल्लीको लक्ष्य छ । यस्तै चेन्नई भने चौंथो जितको खोजीमा रहेको छ । यसै सिजनको पहिलो भेटमा दिल्लीसँग ४४ रनले पराजित आजको खेलमा बदला लिने चाहन्छ । चेन्नई ८ खेलमा ६ अंक जोडेर अंकतालिको छैटौं स्थानमा रहेको छ ।