सन्दिप बेन्चमै भएपनि दिल्लीका अर्का फास्ट बलर कागिसो रबाडाले बनाए यस्तो गजबको रेकर्ड


क्रिकेट

काठमाडौं । शिखर धवनको शतक मद्दतमा दिल्ली क्यापिटल्सले चेन्नाई सुपरकिंग्सलाई पाँच विकेटले हराएको छ । आईपीएल क्रिकेट अन्तर्गत गएरातिको खेलमा चेन्नाईले दिएको १८० रनको लक्ष्य दिल्लीले एक बल बाँकी रहँदा हासिल गर्यो ।

दिल्लीको जितमा शिखर धवनले शतक बनाए। दिल्लीको जितको मुख्य श्रेय नै शिखर धवनलाई जान्छ। ओपनर शिखर धवनले ५८ बलमा १४ चौका र एक छक्का प्रहार गर्दै अविजित १०१ रन बनाए। त्यस्तै, मार्कस स्टोइनिसले २४ र कप्तान श्रेयस ऐयरले २३ रन बनाउँदा अक्षर पटेलले पाँच बलमा अविजित २१ रन बनाए। बलिङतर्फ चेन्नाईका दीपक चाहारले दुई विकेट लिए।

यसअघि शारजाहमा टस जितेर पहिले ब्याटिङ गरेको चेन्‍नईले निर्धारित २० ओभरमा ४ विकेट गुमाएर १७९ रन बनाएको थियो । ओपनर फाफ डुप्लेसीले ५८ रन बनाए भने अम्बाती रायुडुले अविजित ४५ शेन वाट्सनले ३६ र जडेजाले अविजित ३३ रन बनाएका थिए । दिल्लीका एनरिच नोर्त्जेले २ तथा तुषार देशपाण्डे र कगिसो रबाडाले १ १ विकेट लिए ।

रबाडाले बनाए रेकर्ड

दिल्ली क्यापिटल्सबाट आईपीएल खेलिरहेका तीव्र गतिका बलर कागिसो रबाडाले नयाँ उपलब्धि हासिल गरेका छन् । उनले विदेशी खेलाडीको रूपमा दिल्लीका लागि ५० विकेट लिने खेलाडीको उपलब्धि हासिल गरेका हुन् । रबाडा अब विदेशी खेलाडीको रूपमा दिल्लीका लागि सर्वाधिक विकेट लिने पहिलो बलर बनेका छन् । उनले हालसम्म दिल्लीका लागि ५० विकेट लिएका छन् । आज सीएसकेविरुद्ध एक विकेट लिएसँगै रबाडाले यो उपलब्धि हासिल गरे । साथै, उनले आईपीएलमा सर्वाधिक कम बल र कम म्याचमा ५० विकेट लिने खेलाडीकाे पनि कीर्तिमान बनाएका छन् ।