आइपिएल मध्य सिजन ट्रान्सफर : सन्दिपलाई लिन अन्य टिमले चासो देखाएनन्, दिल्लीमै रहने पक्का


क्रिकेट

काठमाडौँ । नेपाली लेग स्पिनर सन्दीप लामिछाने आबद्ध दिल्ली क्यापिटल्सले १३औँ इन्डियन प्रिमियर लिग (आइपिएल)मा उत्कृष्ट प्रदर्शन जारी नै राखेको छ । योपटक प्ले अफ स्थानको दाबेदारीमा दिल्ली निकै अगाडि छ । दिल्लीले यो सिजनमा केही नाम चलेका सिनियर तथा युवा खेलाडीलाई आठ चरणसम्म खेलाएको छैन ।

यसैबीच दिल्लीले ११ खेलाडीलाई मिड सिजन ट्रान्सफर (खेलाडी किनबेच)मा समावेश गरेको थियो । त्यही लिस्टमा सन्दीप पनि परेका थिए । तर मध्य सिजन ट्रान्सफर आज अन्तिम दिनसम्म आईपपुग्दा पनि सन्दिपलाई आफ्नो टिममा ल्याउन कुनै पनि टिमले चासो दिएका छनैन् ।

२०१८ मा सन्दीप न्यूनतम २० लाख भारुमा दिल्लीसँग आबद्ध भएका थिए । पहिलो सिजनको अन्तिम तीन खेलमा सन्दीपले मौका पाए । उनले पहिलो सिजनमा पाँच विकेट लिए । गत वर्षको संस्करणसमेत उनले सुरुवातीमै स्थान बनाए । त्योवेला उनले ६ खेलमा आठ विकेट लिए । सन्दीपको प्रदर्शन उतारचढाव हुँदा थप खेलमा भाग लिन पाएनन् ।

योपटक भने सन्दीपले नौ खेल सकिँदासम्म दिल्लीबाट बलिङ गर्न मौका पाएका छैनन् । यता भारतीय क्रिकेट बोर्ड (बिसिसिआई)ले आइपिएलको सात चरण खेल समाप्तिसँगै मध्य सिजन ट्रान्सफर लागू गरेको थियो। यो भनेको सहभागी फ्रेन्चाइच टोलीले आफ्नोमातहतमा रहेका खेलाडीलाई अक्सनमा राख्नु हो । दुई वा सोभन्दा कम खेल खेलेका खेलाडी मात्र अक्सनमा राख्न पाउने प्रावधान बनाइएको छ । दुईभन्दा बढी खेलमा सहभागिता जनाएका खेलाडीलाई अक्सनमा राख्न मिल्दैन ।

यसअघि अनक्याप्ड खेलाडी मात्र ट्रान्सफर हुने प्रावधान थियो । योपटकको आइपिएलको मध्य सिजन ट्रान्सफरमा ९० खेलाडी समावेश गरिएको छ । आइपिएलको नयाँ नियमअनुसारै सन्दीप मध्य सिजन ट्रान्सफरमा परेका थिए । तर अहिलेसम्म सन्दिप मात्र हैनन् अन्य कुनै पनि खेलाडी मिड ट्रान्फरको माध्यमबाट अन्य टिममा गएका छैनन् । मध्य सिजन ट्रान्सफर नियमअनुसार फ्रेन्चाइज टोलीहरूले कुन खेलाडी लिने भन्ने एकआपसमा प्रस्ताव पठाउनेछन् । दुई टोलीबीचको समझदारीमा नै खेलाडी साटासाट हुनेछ ।

दिल्लीले अजिन्का राहाने, किमो पाउल, एलेक्स क्यारी, अभेष खान, हर्सल पटेल, इशान्त शर्मा, ललित यादव, डेनियल साम्स र मोहित शर्मालाई अक्सनमा समावेश गरेको थियो। पछिल्लो समयमा सन्दीपले टी–२० फ्रेन्चाइजमा उत्कृष्ट प्रदर्शन गरेका कारण पनि उनलाई दिल्लीले अझै विश्वास गरेको छ । विदेशी कोटामा रहेका खेलाडीको प्रदर्शन तारिफयोग्य भएकाले पनि सन्दीपले मौका नपाएको बताइन्छ । विदेशी बलरको प्रदर्शन नराम्रो हुँदा सन्दीप नै दिल्लीको अन्तिम वैकल्पिक स्पिनर हुन् ।

दिल्लीबाट मिड सिजन ट्रान्सफर विन्डोका लागि उपलब्ध रहेका उपलब्ध रहेका खेलाडीहरुको नाम यस प्रकारको रहेको छ:

विदेशी खेलाडी: किमो पल, एलेक्स केयरी, डेनियल श्याम्स र सन्दिप लामिछाने भारतीय खेलाडी: आवेश खान, तुषार देशपांडे, ललिथ यादव, मोहित शर्मा, अजिंक्य राहणे