दिल्लीले अर्को शिजनको आईपिएलमा पनि सन्दिपलाई खरिद गर्ने संकेत दियो


क्रिकेट

काठमाडौं । इन्डियन प्रिमियर लिग (आईपीएल) टी-२० क्रिकेटको १३ औं संस्करण युएईमा सम्पन्न भएको छ । फाईनलमा मुम्बइ इण्डियन्सले दिल्ली क्यापिटल्सलाई पराजित गर्दै उपाधि जितेको छ । यो मुम्बइको पाँचौं उपाधि हो । दिल्ली आइपिएल इतिहासमै पहिलो पटक फाइनल खेलेको थियो ।

दिल्ली क्यापिटल्समा नेपाली खेलाडी सन्दिप लामिछाने पनि आबद्ध थिए । यद्यपि यो सिजन दिल्लीले कूल १७ खेल खेल्दा सन्दिपले एउटा खेल पनि खेल्न पाएनन् । टी–२० फ्रेन्चाइज लिगमा सन्दीप पहिलोपटक पूरै सिजन एक खेल नखेली नै बेन्च बसेको यो नै पहिलोपटक हो । उनी अस्ट्रेलियाको बिग वास, बंगलादेश, पाकिस्तान, अफगानिस्तान प्रिमियर लिग र टी–२० ग्लोबल क्यानडा नियमित खेलाडी बनिसकेका छन् । सन् २०१८ मा दिल्लीले सन्दीपलाई अक्सनमा न्यूनतम २० लाख भारुमा भित्र्याएको थियो । नेपाली खेलाडीबाट कुनै पनि अन्तर्राष्ट्रिय टी–२० फ्रेन्चाइजमा आबद्ध भएका खेलाडी सन्दीप नै पहिलो हुन् ।

यो सँगै दिल्लीसँग सन्दिप लामिछानेको ३ बर्षे करार पनि समाप्त भएको छ । अब अर्को शिजनको आईपिएल खेल्न सन्दिपले पुन: अक्शनमा जानु पर्नेछ । अर्को शिजनमा सन्दिपलाई कुन टिमले खरिद गर्छ भन्ने अहिलेसम्म पक्का त भएको छैन तर फेरि दिल्लीले नै सन्दिपलाई खरिद गर्ने संकत गरेको । दिल्लीले एउटा पनि खेल नखेलाएर सन्दिपको केरियर नै बर्वाद पारेको आरोप लागिरहेको बेला दिल्ली क्यापिटल्सले ट्वीटरमार्फत धन्यवाद दिदै पुन: सन्दिपलाई खरिद गर्ने संकेत गरेको हो ।

धन्यवाद सन्देशमा दिल्लीले सन्दिपलाई प्रशिक्षणका क्रममा आफ्नो शतप्रतिशत ऊर्जा दिएको भनेको छ । सधैं हाँसिरहने र टि–२० का विश्वव्यापी सनसनी भएका कारण उनलाई दिल्लीले सुन्दर व्यक्ति भन्ने ट्वीटमा उल्लेख छ । दिल्लीले उनलाई ड्रिम ११ आइपिएल २०२० को सबै सम्झनाको लागि धन्यवाद भनेको छ ।

सन्दीपले पहिलो सिजनमा रोयल्स च्यालेन्जर्स बेंग्लोरविरुद्ध डेब्यु गरेका थिए । त्यसवेला प्ले अफ दौडबाट बाहिरिएपछि दिल्लीले सन्दीपलाई मौका दिइएको थियो । सन्दीपले आफ्नो आइपिएलको डेब्यु खेलमै विकेट लिन सफल भए । उनले बेंग्लोरका पार्थिव पटेललाई आउट गर्दै डेब्यु खेलमा विकेट हात पारे । त्यसपछि उनले लगातार दुई खेलमा मौका पाए । समग्रमा सन्दीपले पहिलो सिजनमा पाँच विकेट पाए । गत वर्षको संस्करणमा सुरुमै स्थान बनाएका सन्दीपले ६ खेलमा सात विकेट लिए ।