सन्दिपसँगै यो शिजनको आईपिएल खेलेका यी स्टार खेलाडीले सन्दिपसँगै एउटै टिमबाट बिबिएल खेल्ने


क्रिकेट

काठमाडौं । वेष्ट इण्डिजका अलराउन्डर किमो पल र नेपाली स्टार स्पिनर सन्दिप लामिछाने भर्खरै सम्पन्न आईपिएलमा एउटै टिम दिल्ली क्यापिटल्समा आबद्ध थिए । त्यतिमात्र हैन दिल्लीले आईपिएलको फाईनल सहित १७ खेल खेल्दा पनि दुबै जनाले एउटा पनि खेल खेल्न पाएनन् । अब किमो पल र सन्दिप लामिछानेले पुन: एउटै टिमबाट अष्ट्रेलियाको बिग ब्यास लिग खेल्ने संम्भावना बढेको छ।

बुधवार होबार्टले पललाई अनुबन्ध गरेको जानकारी ट्विटरमा मार्फत दिएको छ । उता बिबिएलमा होबार्ट हुरिकेन्सबाट खेल्न पाउँदा आफु उत्साहि भएको पलले बताएका छन् । “आगामी बीबीएलको लागि होबार्टमा भाग लिन पाउँदा म धेरै उत्साहित छु, र अवसरको लागि म अत्यन्त आभारी छु,” पावलले भने। “म सँधै एक ठूलो बीबीएल प्रशंसक हुँ र टूर्नामेन्टलाई लिएर निकै उत्सुक छु। मैले आईपीएलमा रिकीसँग होबार्ट र तस्मानियाको बारेमा कुरा गरिरहने पनि पलले बताए ।

किमो पल बलिङका साथै तल्लो क्रममा राम्रो ब्याटिङ पनि गर्न सक्छन् । किमोलाई दिल्लीले २०१९ मा टिममा अनुबन्ध गरेका थिए । गत सिजनमा ८ म्याचमा ९ विकेट लिएका उनले आईपीएल २०२० मा भने दिल्लीले मौका नै दिएन । हालसम्म हरिकेन्सले विदेशी खेलाडीको रूपमा किमोसहित कोलिन इन्ग्राम, टिम डेविड, डेविड मलानलाई अनुबन्ध गरिसकेको छ ।

बीबीएलमा सन्दीप भने अघिल्ला दुई सिजन मेलबर्न स्टार्सबाट खेलेका थिए। मेलबर्न स्टार्सका लागि सन्दीपले पहिलो सिजन ८ खेलमा ११ विकेट लिएका थिए। बिग बासका लागि सम्झौता हुनुअघि अन्य प्रतियोगितामा भएको आबद्धताका कारण उनी प्रतियोगिताका सुरुका केही खेल खेलेर पछि अन्तिम समयमा मात्र फर्किएका थिए। त्यस सिजन स्टार्स फाइनलसम्म पुगेको थियो।

गत सिजन उनले १३ खेलमा १५ विकेट लिएका थिए। उनी स्टार्सका लागि सर्वाधिक विकेट लिने बलरको सूचिमा तेस्रो स्थानमा थिए। त्यतिबेला पनि स्टार्स फाइनलमा पुगेर पराजित भएको थियो। यी दुवै सिजन स्टार्सका लागि उनी पहिलो रोजाईका बलर थिए। सिजनको बिग ब्यास लिग आगामी १० डिसेम्बरबाट सुरु हुँदैछ। लिग ६ फेब्रुअरीमा सकिनेछ।