नेपाली क्रिकेट खेलाडीहरुको कोरोना परीक्षण, सन्दिप लामिछाने सहित अन्य ६ जनाको गरिएन


क्रिकेट

काठमाडौं, मंसिर ९ । अभ्यासका लागि बन्द प्रशिक्षणमा बोलाइएका नेपाली राष्ट्रिय क्रिकेट टिमका खेलाडीहरुको मंगलबार ‘पीसीआर’ परीक्षणका लागि स्वाब लिइएको छ । कोरोना संक्रमणको जोखिका बीच अभ्यास सुरु गरेको नेपाल क्रिकेट संघ (क्यान)ले बन्द प्रशिक्षणमा सहभागी हुने खेलाडी, प्रशिक्षक र व्यवस्थापकहरुको स्वाब लिएको हो । मंगलबार खेलाडी, फिजियोथेरापिस्ट र प्रशिक्षक गरी १९ जनाको पीसीआर परीक्षणका लागि स्वाब लिइएको छ । ६ जना खेलाडीहरु अनुपस्थित भएका छन्।

अनुपस्थित ६ जना खेलाडीहरु शरद भेसावकर, बसन्त रेग्मी, सुबास खकुरेल, करन केसी, सन्दिप लामिछाने र कुशल मल्ल रहेका छन्। कुशल मल्लको हाल १२ कक्षाको परिक्षा चलीरहेकोले अनुपस्थित रहेका हुन् भने अन्य खेलाडीहरुले अत्यावश्यक व्यक्तिगत कारण देखाए छन्।

यसैगरी, १३ जना ‘मेन्टेनेन्स स्टाफ’को पनि पीसीआर परीक्षण गरिने भएको छ । उनीहरुको पनि मंगलबार नै स्वाब लिइएको छ । सबैको पीसीआर परीक्षण कीर्तिपुरस्थित त्रिवि क्रिकेट मैदानमा भएको हो ।बन्द प्रशिक्षण बुधबार (भोलि)बाट सुरु हुँदैछ । बन्द प्रशिक्षणका लागि क्यानले २२ जना खेलाडीलाई बोलाएको छ ।

कोरोनाभाइरस महामारीको कारण नेपाली टोलीको नौ महिनापछि बन्द प्रशिक्षण हुन लागेको हो । प्रशिक्षक जगत टमटाले प्रशिक्षण दिनुहुनेछ । बन्द प्रशिक्षणका लागि कप्तान ज्ञानेन्द्र मल्ल, उपकप्तान दीपेन्द्रसिंह ऐरी, पारस खड्का सन्दीप लामिछाने, शरद भेषावकर, करण केसी, वसन्त रेग्मी, विनोद भण्डरी र सोमपाल कामीलाई बोलाइएको छ ।

यस्तै, सुशन भारी, ललितनारायाण राजवंशी, आरिफ शेख, पवन सराफ, अविनाश बोहरा, सुवास खकुरेल, रोहितकुमार पौडेल र कुशल मल्ललाई पनि प्रशिक्षणका लागि बोलाइएको छ । यसैगरी, राशिद खान, कमलसिंह ऐरी, सन्दीप जोरा, किशोर महतो र भुवन कार्कीलाई पनि बन्द प्रशिक्षणमा राखिएको छ ।