माईकल क्लार्कले स्पष्ट भनिदिए : ‘भारतले किङ कोहली बिना टेस्ट शिरिज ४-० ले हार्छ’


क्रिकेट

काठमाण्डाै : अस्ट्रेलिया क्रिकेट टिमका पूर्वकप्तान माइकल क्लार्कले भारत र अस्ट्रेलियाबीचको टेस्ट शृङ्खलालाई लिएर एक बयान दिएका छन् । क्लार्कका अनुसार यदि भारतीय टिमले एकदिवसीय र टी–२० शृङ्खला नजिते उसले टेस्ट शृङ्खला पनि चार–शून्यले हार बेहोर्नुपर्नेछ ।

माइकल क्लार्कले भारतीय टिम सीमित ओभर्सको शृङ्खलाबाट नै जितको बाटो समात्ने बताए । भारती क्रिकेट टिमका कप्तान विराट कोहलीले एकदिवसीय र टी–२० मा टिमलाई नजिताए टेस्टमा एक खेल पनि जित्न नसक्ने क्लार्कले बताए ।

स्काई स्पोर्ट्स रेडियोसँगको कुराकानीमा माइकल क्लार्कले भने, ‘एकदिवसीय र टी–२० शृङ्खलामा विराट कोहली अघि बढेर टिमको नेतृत्व गर्न सक्छन् । मेरो विचारमा सीमित ओभर्सको सिरिजमा काेहलीले भारतलाई कस्ताे लय दिन्छन् त्यसको ठूलो असर उनको अनुपस्थितिमा टेस्ट शृङ्खलामा पर्नेछ । यदि भारतीय टिमले एकदिवसीय र टी–२० शृङ्खला जित्न नसके ऊ निकै कठिन अवस्थामा आइपुग्नेछ र टेस्ट शृङ्खला मेरो विचारमा चार–शून्यले हार बेहोर्नुपर्नेछ ।’

भारतीय टिमका कप्तान पहिलो टेस्टपछि टिममा अनुपस्थित हुनेछन् र उनको अनुपस्थितिमा अजिन्क्या रहाणेले टिमको कप्तानी सम्हाल्नेछन् । अर्का ब्याट्सम्यान रोहित शर्मा टेस्ट शृङ्खलाका लागि टिममा जोडिने बताइएको थियो तर उनले पनि सिरिज गुमाउन सक्छन् । यी दुई खेलाडीको अनुपस्थितिमा भारतीय टिमलाई ब्याट्सम्यानको अभाव महसुस हुनेछ ।

पारस खड्का आइसिसी अवार्डका लागि मनोनयनमा

नेपाली राष्ट्रिय क्रिकेट टोलीका पूर्वकप्तान पारस खड्का ‘आइसिसी मेन्स एशोसिएट प्लेयर अफ दि डिकेड’ अवार्डको मनोनयनमा पर्नुभएको छ । अन्तर्राष्ट्रिय क्रिकेट परिषद् (आइसिसी) ले मंगलबार सार्वजनिक गरेको सूचीमा पूर्वकप्तान खड्का दशकको उत्कृष्ट क्रिकेटरमध्ये एशोसिएट विधाको मनोनयनमा पर्नुभएको हो ।

मनोनयनमा नेपालबाट खड्कासँगै स्कटल्यान्डका तीन तथा नेदरल्यान्ड्स र पपुवा एण्ड न्यूगिनीका एक एक खेलाडी मनोनयनमा पर्नुभएको छ । स्कटल्यान्डका रिची बेरिनटन, केल कोइजर र कोलम म्याकलियोड तथा नेदरल्यान्ड्सका पिटर बोरेन र पपुवा एन्ड न्युगिनीका असद भालासमेत मनोनयनमा पर्नुभएको छ ।

आइसिसीले विश्व क्रिकेटको पुरुष तथा महिला खेलाडीलाई विभिन्न विधामा अवार्ड प्रदान गर्दै आएको छ । यस वर्ष आइसिसीले दशकको क्रिकेट खेलाडी (महिला तथा पुरुष), दशकको पुरुष टेस्ट खेलाडी, दशकको एकदिवसीय खेलाडी (महिला तथा पुरुष), दशकको टी–२० खेलाडी (महिला तथा पुरुष), दशकको एशोसिएट खेलाडी (महिला तथा पुरुष) र आइसिसी स्पिरिट अफ क्रिकेट अफ दि डिकेड विधामा पुरस्कार प्रदान गर्ने निर्णय गरेको छ ।

अवार्डका लागि मनोनयनमा पर्नुभएका खेलाडीलाई मत दिन आइसिसीले आफ्नो वेभपोर्टलमा व्यवस्था गरेको छ । आइसिसीले सो अवार्ड आगामी पुस २ गते घोषणा गर्ने जनाएको छ । गत वर्ष खड्काले नेपाली टोलीको कप्तानी छाड्नुभएको थियो । खड्का २००९ मा विनोद दासको ठाउँमा नेपाली टोलीको कप्तान बन्नुभएको थियो ।