ठुलो खुसिको खबर ! वरियताको आधारमा नेपालले सिधै विश्व कप ग्लोबल छनोट खेल्न पाउने


क्रिकेट

काठमाण्डाै : नेपालले सन् २०२२ मा अष्ट्रेलियामा हुने आईसीसी टी–२० विश्वकपका लागि सोझै ग्लोबल छनोट खेल्न पाउने भएको छ।आईसीसीले बनाएको नयाँ छनोट प्रक्रिया अनुसार २०२२ मा हुने टी–२० विश्वकपका लागि २०२० को जनवरी एक तारिखसम्म वरीयताका आधारमा जिम्बाब्वे, नेपाल, यूएई र हङकङले सोझै ग्लोबल छनोटमा स्थान बनाउने भएका हुन्।

२०२२ को विश्वकपमा आईसीसीले १६ टिमलाई सहभागिता गराउने भएको छ। २०२० मा हुने भनिएको यो विश्वकप कोरोनाका कारण २०२२ का लागि सरेको थियो। अब आईसीसीले यो विश्वकपका लागि अफ्रिका, अमेरीका, एसिया, पूर्वी एसिया र यूरोप गरेर ११ वटा क्षेत्रीय छनोट प्रतियोगिता गर्ने भएको छ। त्यहाँबाट ८ टिम दोस्रो चरणको छनोटमा स्थान बनाउनेछ।

सबै उपक्षेत्रीय र क्षेत्रीय छनोट प्रतियोगिता २०२१ र २०२२ को सुरुवातमा हुनेछन्। यसमा २०२१ मा भारतमा हुने टी–२० विश्वकपमा पहिलो चरणमा पुगेका चार टिम र टी २० बरियतामा रहेका शीर्ष चार टिमले सोझै ग्लोबल छनोट खेल्नेछन्।

२०२० को जनवरीको वरीयताअनुसार नेपालसँगै जिम्बाब्वे, यूएई र हङकङले सोझै ग्लोबल छनोट खेल्न पाउने भएका छन्। उनीहरुले क्षेत्रीय छनोट खेल्नुनपर्ने भएको छ। २०२२ को विश्वकपका लागि १२ टिम २०२१ को टी–२० विश्वकपबाट साझै छनोट हुनेछन्। बाँकी चार टिममा दुई टिम पहिलो ग्लोबल छनोटबाट आउनेछन् भने बाँकी दुई टिम २०२२ मा नै हुने दोस्रो ग्लोबल छनोटबाट आउनेछन्।

आईसीसीले २०२१ को टी–२० विश्वकपको पहिलो चरणका खेल सकिएपछि दुईवटा ग्लोबल छनोट खेल्ने देशको नाम फाइनल गर्ने भएको छ। २०२२ को टी–२० विश्वकप छनोटका लागि अफ्रिकामा दुईवटा उपक्षेत्रीय छनोट हुनेछन भने एसियामा पनि दुई, यूरोपमा तीन वटा उप क्षेत्रीय छनोट हुनेछन्। तर, अमेरिका र इष्ट एसियामा सोझै क्षेत्रीय छनोट हुनेछन्।