नयाँ सिजनको इंग्लिस प्रिमियर लिग फुटबल आजदेखि


खेलकुद

काठमाडौं । नयाँ सिजनको इंग्लिस प्रिमियर लिग फुटबल शुक्रबार (आज)देखि सुरु हुँदैछ । शुक्रबार राति आर्सनल र लेस्टर सिटीबीचको खेलबाट नयाँ सिजनको इंग्लिस फुटबलको औपचारिक प्रारम्भ हुन लागेको हो । आर्सनलको मैदान इमाइरेट्स रंगशालामा नेपाली समयअनुसार राति साढे १२ बजे यो खेल सुरु हुनेछ ।

यसपटक पनि सदाबहार दाबेदारहरु चेल्सी, म्यानचेस्टर सिटी, म्यानचेस्टर युनाइटेड, आर्सनल र लिभरपुलसँगै प्रिमियर डिभिजनका नवप्रवेशी टोलीहरु न्युकासल युनाइटेड, ब्राइटन र हडर्सफिल्ड टाउनको प्रदर्शनमाथि धेरैको नजर हुनेछ ।

प्रिमियर लिग फुटबलमा शनिबार ७ खेल हुनेछन् । साविक विजेता चेल्सीले बर्न्लेको सामना गर्दा वाट्फोर्ड र लिभरपुल भिड्नेछन् । यसैगरी, म्यानचेस्टर सिटी र ब्राइटन, एभर्टन र स्टोक सिटी, साउथह्याम्पटन र स्वान्सी सिटी, वेस्ट ब्रोम र बर्नमाउथ तथा क्रिस्टल प्यालेस र हडर्सफिल्ड टाउनबीचको खेल पनि शनिबार नै हुनेछ ।

यसैगरी, आइतबार हुने खेलमा न्यूकासल युनाइटेड र टोटनह्याम हट्सपर तथा म्यानचेस्टर युनाइटेड र वेस्ट ह्याम युनाइटेड भिड्नेछन् । यसपटक शीर्ष क्लबहरुले आबद्ध गरेका नयाँ खेलाडीको प्रदर्शन पनि हेर्नलायक हुनेछ ।

प्रिमियरसिपमा आएका नयाँ खेलाडीमध्ये चेल्सीका स्पेनिस स्ट्राइकर अल्भारो मोराटा, आर्सनलका फ्रेन्च स्ट्राइकर लाकाजेटी, म्यानचेस्टर युनाइटेडका बेल्जियन स्ट्राइकर रोमेलु लुकाकु, वेस्ट ह्याम युनाइटेडका हेभियर हर्नान्डेज र म्यानचेस्टर सिटीका कायल वाल्करलगायतका डिफेन्डरहरुलाई निकै महत्वका साथ हेरिएको छ । इमेज खबरबाट