गौरिका देखि सावित्रा भण्डारी सम्म…पल्सर स्पोर्टस अवार्डमा महिलाको बाहुल्यता


खेलकुद

काठमाडौं । नेपाल खेलकुद पत्रकार मञ्चको आयोजनामा हुन लागेको पल्सर स्पोर्टस अवार्डको पिपुल्स च्वाइस अवार्डको मनोनयनमा महिला खेलाडीको बाहुल्यता रहेको छ । मनोनयनमा ५ खेलाडीमध्ये ४ महिला खेलाडी छन् । गत वर्ष आयोजना भएको १३ औं दक्षिण एसियाली खेलकुद (साग) मा उच्च प्रदर्शन गरेका र वर्षभर चर्चामा रहेको मध्येबाट ५ खेलाडीको मनोनयन आयोजक नेपाल खेलकुद पत्रकार मञ्चले शुक्रबार सार्वजनिक गरेको हो ।

यस पटक १३ औं सागमा ४ स्वर्ण पदक जितेकी गौरिका सिंह, दोहोरो स्वर्ण पदक जितेका मण्डेकाजी श्रेष्ठ पनि मनाेनयनमा छन् । भलिबलकी कप्तान अरुणा शाही, बास्केबलकी कप्तान सदिना श्रेष्ठ र फुटबलकी सावित्रा भण्डारी पिपुल्स च्वाइसको मनोनयमा परेका छन् ।

मनोनयनमा परेका खेलाडीको छनोट इ–सेवामार्फत एसएमएम भोटिङ, फेसबुक लाइक, मञ्चका सदस्यको भोट र राष्ट्रिय संघका मुख्य प्रशिक्षकको भोटका आधारमा हुनेछ। भोटिङ लाइन शुक्रबारबाट सुरु भई पुस २७ गते राति १२ः०० बजेसम्म खुला रहने बताइएको छ।

यसअघि मोबाइलबाट एसएमएस भोटिङ गरिँदै आएकोमा यसपालि इ–सेवामार्फत गरिने मञ्चले जनाएको छ। भोटिङका लागि इ–सेवाको एप डाउनलोड गरी आफूलाई मनपर्ने खेलाडीको प्रोफाइलमा गएर भोट गर्न सकिने मञ्चले जनाएको छ।

पुस २८ गते आयोजना हुने पल्सर स्पोर्टस अवार्डकै दौरान पिपल्स च्वाइस अवार्डको विजेताको घोषणा गरिनेछ। पल्सर स्पोर्ट्स अवार्ड २०७६ मा विभिन्न १० विधामा खेलाडी र खेलकर्मीलाई सम्मान गरिनेछ।