खुसिको खबर ! सिड्नी थन्डरबिरुद्ब आजको खेलमा सन्दिप पनि प्लेईङ इलाभेनमा पर्ने पक्का


क्रिकेट

काठमाडौं, ५ माघ : नेपाली स्टार स्पिनर सन्दिप लामिछाने आबद्ध होबार्ट हरिकेन्सले अष्ट्रेलियामा जारी बिग बास लिग (बीबीएल)मा आज सिड्नी थन्डरसँग खेल्दैछन् । यो खेल नेपाली समयअनुसार आज दिउँसो २ बजेपछि सुरु हुनेछ । होबार्टले जारी सिजनमा १० म्याच खेल्दा ५ मा जित र ५ खेलमा हारेका सामना गरेको छ । होबार्ट तालिकामा १९ अंकका साथ सातौँ स्थामना छ ।

सन्दीप आजको सिड्नी थन्डर बिरुद्धको खेलमा पनि प्लेइङ-११ मा पर्ने पक्का छ । उनी आइतबार घोषणा गरिएको १५ सदस्यीय टोलीमा पनि अटाएका थिए । सन्दीपले यो सिजन टोलीका लागि चार खेल मात्र खेलेका छन् जसमध्ये पछिल्ला तीन खेलमा हुरिकेन्स पराजित भएको छ। कोरोना भाइरसको संक्रमण भएपछि सन्दीपले हुरिकेन्सका सुरुका ६ खेल गुमाएका थिए।

ती खेलमा हुरिकेन्सले चार जित र दुई हारको नतिजा निकालेको थियो। होबर्टले अब पहिलो चरणमा चार खेल खेल्न बाँकी छ। यी खेलको नतिजाले उ शीर्ष चार भित्र रहने नरहने निर्क्योल हुने छ। सिड्नीले १० मध्ये ६ खेलमा जित हासिल गरेको छ । सिड्नी २३ अंकका साथ तालिकको दोस्रो स्थानमा छ । पछिल्ला पाँच म्याचको तुलाना गर्ने हो भने सिड्नीविरुद्ध होबार्ट एक खेलमा मात्र विजयी भएको छ ।

बिग बास लिगको पछिल्लो सिजन सन्दीपले मेलबर्न स्टार्सका लागि खेलेका थिए। त्यतिबेला मेलबर्न स्टार्स फाइनलसम्म पुगेको थियो। सन्दीपले १३ खेलमा १५ विकेट हात पारेका थिए,७.४४ रनको बलिङ इकोनोमीमा। ह्यारिस रौफ(१० खेलमा २० विकेट) र एडम जाम्पा (१२ खेलमा २० विकेट)पछि उनी मेलबर्न स्टार्सका लागि सर्वाधिक विकेट लिने बलरको सूचीमा तेस्रो स्थानमा थिए।

होबार्टको सम्भावित प्लेइङ-११ : बेन म्याकडर्मोट (विकेटकीपर), डार्सी सर्ट, डेविड मलान, पीटर ह्यान्सकम्ब (कप्तान), कोलिन इन्ग्राम, टिम डेविड, स्कट बोल्याण्ड, नाथन एलिस, रिले मेरीडिथ, सन्दीप लामिछाने र विल पार्कर ।

प्रधानमन्त्री कप पुरुष क्रिकेटमा आर्मी र बाग्मती प्रदेश बिजयी

राजधानीमा जारी प्रधानमन्त्री कप पुरुष राष्ट्रिय क्रिकेट प्रतियोगितामा आइतबार विभागीय टोली त्रिभुवन आर्मी क्लब र बाग्मती प्रदेशले जित निकालेका छन् । मुलपानी क्रिकेट मैदानमा भएको खेलमा विभागीय टोली आर्मीले कर्णाली प्रदेशमाथि ८० रनको फराकिलो जित निकाल्दा जारी प्रतियोगितामा लगातार दोस्रो जित निकालेको हो ।

यस्तै आइतबारकै अर्को खेलमा विभागीय टोली तथा साविकको विजेता नेपाल पुलिस क्लबलाई ७ विकेटले पराजित गर्दै बाग्मतीले जारी प्रतियोगितामा पहिलो जित निकालेको हो ।

आर्मीले लगातार जित निकाल्दा कर्णाली प्रदेशले पराजयबाट प्रतियोगिताको सुरुवात गरेको छ । आर्मीले दिएको १ सय ९६ रनको लक्ष्य पछ्याउने क्रममा कर्णालीले मात्र १ सय १५ रन जोड्न सक्यो । ३३.३ ओभरमा कर्णालीले सबै विकेट गुमाउँदा प्रतियोगिता पराजयबाट सुरुवात गर्न पुगेको हो ।

जवाफी ब्याटिङ गर्ने क्रममा कर्णालीका लागि कप्तान रविन्द्र शाहिले सर्वाधिक ३० रनको पारी खेल्दा ओपनर हेमन्त ओलीले १६ तथा दिनेश अधिकारीले १२ रनको दोहोरो स्कोर गरे । यस बाहेकका ब्याट्सम्यानले दोहोर अंकको स्कोर गर्न सकेनन् । कर्णालीको इनिङ्सलाई रोक्न आर्मीका सुशान भारीले सर्वाधिक ४ विकेट निकाल्दा शहब अलमले तीन, रोहित पौडेलले दुई तथा हरि चौहानले एक विकेट आफ्नो नाममा लेखाए । ६ ओभर बलिङ गरेको जितेन्द्र मुखियाले दुई मेडन राख्दै १६ रन खर्चिए ।

यस अघि टस जितेर पहिले ब्याटिङ गरेको आर्मीले ४३.१ ओभरमा सबै विकेट गुमाएर १ सय ९५ रन जोडेको थियो । आर्मीका लागि ओपनर अनिल कुमार मण्डले ८९ रनको पारी खेले । १ सय १४ बल सामना गरेका अनिलले १४ चौका प्रहार गरेका थिए । यस्तै कप्तान विनोद भण्डारीले ४१ रनको पारी खेल्दा राजेश पुलामीले १६, लोकेश बमले १३ तथा रोहित पौडेलले ११ रनको योगदान गरे । अन्य ब्याट्सम्यान १० रन भन्दा कम रनमा पवेलिय फर्किएका थिए ।

बलिङ तर्फ कर्णाली प्रदशेका लागि दिनेश अधिकारी, राज शाह र दिवन पुनले समान २-२ विकेट हात पार्दा रविन्द्र शाहि, युनिस सिंह र अनुज चुनाराले एक÷एक विकेट आफ्नो नाममा लेखाए ।

पुरुष क्रिकेट प्रतियोगिता अन्तर्गत आइतबार कीर्तिपुरस्थित त्रिभुवन विश्व विद्यालयको मैदानमा भएको अर्को खेलमा पुलिस क्लबलाई ७ विकेटले पराजित गर्दै बागमतीले सुखद सुरुवात गरेको छ । पुलिसले दिएको १ सय १२ रनको सामान्य लक्ष्य बागमतीले ३४ ओभर ४ बलमा मात्र ३ विकेट गुमाएर पुरा गर्दा विजयी सुरुआत गरेको हो । बागमतीको जितमा पृथु बास्कोटाले अविजित रहदै ४८ रन बनाए ।

इशान पाण्डेले अविजित १७ रन बनाए ।पारस खड्काले १७ रन जोड्दा आदील खानले १२ रन जोडे । आकाश थापा १ रनमा आउट भए ।पुलिसका दिपेन्द्र सिंह ऐरी र ललित राजवंशीले १-१ विकेट लिए ।

यस अघि पहिले ब्याटिङ गरेको पुलिसले २९ ओभर ३ बलमा अलआउट हुँदै १ सय ११ रन जोडेको थियो । पुलिसका लागि ओपनरद्वय सुनिल धमलाले २२ बलमा ३ चौकासहित १७ तथा कुशल भूर्तेलले ३९ बलमा २ चौकासहित १७ रन बनाए ।त्यस्तै अमित श्रेष्ठ ६ रनमा पेविलियन फर्किदा दीपेन्द्र सिंह ऐरीले ३९ बलमा २ चौकासहित २१ रनको योगदान गरे ।

आरिफ शेख २१, अनिल साह १, कप्तान मन्जित श्रेष्ठ ५, रसिद खान १, ललित राजवंशी १ रनमा आउट हुँदा सागर ढकाल १ रनमा अविजित रहे ।बागमतीका नन्दन यादवले ९ ओभरमा १ मेडनसहित ३१ रन खर्चेर ४ विकेट लिए । तिलक भण्डारीले ७ ओभर ३ बलमा १ मेडनसहित १७ रन खर्चेर ४ विकेट लिए ।रामनरेश गिरीले ६ ओभरमा ३० रन खर्चेर २ विकेट लिए ।

प्रतियोगितामा सोमबार कीर्तिपुरको मैदानमा सुदुर पश्चिम प्रदेश र बागमती प्रदेश तथा गण्डकी प्रदेश र प्रदेश १ बीच मूलपानी मैदानमा प्रतिस्पर्धा हुनेछ ।