सन्दिपलाई टिमबाट निकाल्ने दिल्ली क्यापिटल्सलाई नेपाली फ्यानले सिकाए ठुलो सबक


क्रिकेट

काठमाडौं । इन्डियन प्रिमियर लिग (आईपीएल)को एक फ्रेन्चाइज टीम दिल्ली क्यापिटल्सले बुधबार आफ्ना अक्सन अघिका (रिटेन) खेलाडीहरूको सूची सार्वजनिक गर्यो । उक्त सूचीबाट नेपाली क्रिकेटर सन्दीप लामिछानेको नाम हटेको थियो । दिल्लीले सन्दीपसँगको तीनवर्षको सम्झौता सकिएसँगै उनलाई रिलिज गरेको हो ।

सन्दीपलाई रिटेन खेलाडीको सूचीमा नदेखेपछि नेपाली समर्थकहरूले दिल्ली क्यापिटल्सको फेसबुक पेज अनलाइन गर्न थालेका छन् । नेपाली समर्थकहरुले सन्दीपलाई रिटेन खेलाडीको सूचीमा नराखेसँगै अभियान नै चलाएर अनलाइन गर्न थालेका हुन् ।

बुधबार साँझ ६ बजेर ४९ मिनेटमा रिटेन खेलाडीकाे सूची सार्वजनिक गरेको दिल्लीको लाइक उक्त समयसम्म ६८ लाख ७० हजार ९ सय ६५ थियो । तर त्यसपछि सन्दीपका नेपाली समर्थकले अभियान नै चलाएर अनलाइक गरेसँगै बिहीबार साँझ ७ बजेसम्म दिल्लीकाे पेजमा लाइक घटेर ६८ लाख ६० हजार ३ सय १६ मा झरिसकेकाे छ ।

पछिल्लो २४ घण्टामा दिल्लीलाई १० हजारभन्दा बढी लाइक गुमाउनु परेको छ । नेपाली खेलाडी सन्दीपलाई टीममा लिएपछि अधिकांश नेपालीले दिल्ली क्यापिटल्सको पेज लाइक गरेका थिए । दिल्लीकाे जम्मा पेज लाइकमध्ये ३५ प्रतिशतभन्दा बढी लाइक नेपालीहरूकाे रहेकाे छ ।

धमलाको शतक र सर्राफको कीर्तिमानी अर्धशतकमा पुलिसले हरायो लुम्बिनीलाई

प्रधानमन्त्री कप एकदिवसीय क्रिकेट प्रतियोगितामा नेपाल पुलिस क्लबले लुम्बिनी प्रदेशलाई पराजित गरेको छ। समूह ‘बी’ को खेलमा पुलिसले दोस्रो जित हात पार्ने क्रममा लुम्बिनीलाई ७४ रनले पराजित गर्‍यो। यसअघि पहिलो खेलमा जित निकालेको लुम्बिनी दोस्रो खेलमा भने पराजित भयो।

पुलिसले दिएको ३११ रनको लक्ष्य पछ्याएको लुम्बिनीले ५० ओभरमा ७ विकेटको क्षतिमा २३६ रन जोड्न सक्यो। लुम्बिनीका लागि सौरभ खनालले ७४ रन जोडे पनि जितका लागि पर्याप्त हुन सकेन। उनले ६० बलमा ६ चौका र ५ छक्का हिर्काए।

कप्तान कृष्ण कार्कीले नटआउट ४० रन जोडे। बलिङमा पुलिसका रासिद खान र पवन सर्राफले २-२ विकेट लिए। त्यसअघि टस हारेर पहिले ब्याटिङ गरेको पुलिसले ५० ओभरमा ४ विकेटको क्षतिमा ३१० रन जोड्यो।

पुलिसका लागि ओपनर सुनील धमलाले १०४ रन जोडे। उनले १४५ बलमा ७ चौका र १ छक्का हिर्काए। दीपेन्द्रसिंह ऐरीले ८५ रनको योगदान दिए। उनले ६१ बलमा १ चौका र ६ छक्का हिर्काए।

आक्रामक ब्याटिङ गरेका पवन सर्राफले १३ बलमा नटआउट ५० रन जोडे। प्रधानमन्त्री कपमा सर्वाधिक छिटो अर्धशतक बनाएका उनले १ चौका र ६ छक्का हिर्काए। बलिङमा लुम्बिनीका कृष्ण कार्की, अनिल खरेल, दीपेन्द्र रावत र सौरभ खनालले १-१ विकेट लिए