‘किङ कोहलीलाई हटाएर रहाणेलाई तुरुन्त कप्तान बनाउ’


क्रिकेट

काठमाण्डाै : अस्ट्रेलियाविरुद्ध भारतीय टिमलाई दुई–एकले टेस्ट शृङ्खला जिताउने अजिन्क्या रहाणेको कप्तानीको सबैतिर चर्चा भइरहेको छ । एडिलेडमा खेलिएको पहिलो टेस्टमा भारतीय टिम अस्ट्रेलियाविरुद्ध दोस्रो पारीमा मात्र ३६ रनमा समेटिएको थियो । कङ्गारु (अस्ट्रेलिया) टिमले साढे दुई दिनभित्र नै भारतलाई आठ विकेटले हराएर सिरिजमा एक–शून्यको अग्रता लिएको थियो ।

विराट कोहली अस्ट्रेलियाविरुद्धको टेस्ट शृङ्खला बीचमै छोडेर भारत फर्किसकेका थिए तर कोहलीको ठाउँमा कप्तानी गर्ने अजिन्क्य रहाणेले अस्ट्रेलियाको माइण्ड गेम पार गर्दै टिमलाई फेरि खडा गरे । भारतीय टिमले रहाणेको कप्तानीमा मेलबर्नमा उत्कृष्ट पुनरागमन गर्याे । अजिन्क्य रहाणेले भारतीय टिमको अगुवाइ गर्दै मेलबर्नमा उत्कृष्ट शतक प्रहार गरे । रहाणेले टिमलाई कङ्गारुमाथि आठ विकेटको उत्कृष्ट जित दिलाए ।

इङ्ग्ल्याण्डका पूर्वकप्तान माइकल वन, अस्ट्रेलियाका पूर्वकप्तान रिकी प्वोइन्टिङ र शेन वार्नले पनि रहाणेको कप्तानीको तरिफ गरेका थिए । भारतीय पूर्वकप्तान बिशन सिंह बेदीले विराट कोहलीको ठाउँमा अजिन्क्य रहाणेलाई नियमित (पर्मानेन्ट) कप्तान बनाउन माग गरेका छन् ।

बिशन सिंह बेदीले इण्डियन एक्सप्रेसमा लेखेको एक स्तम्भमार्फत भने, ‘अजिन्क्य रहाणे मलाई टाइगर पटौदीको याद दिलाउँछन् । रहाणेले घायल टिमको कप्तानी गर्दै भारतलाई अस्ट्रेलियामा दुई–एकले शृङ्खला जिताउनु तरिफको योग्य छ ।’ बिशनले भने, ‘रहाणेको बलरमा परिवर्तन र फिल्डिङ सजाउने कला पटौदीको जस्तै देखियो ।

भारतीय टिमका महान ब्याट्सम्यान र साधारण कप्तानमध्ये कुनै एकलाई छान्ने समय आएको छ ।’ बिशन सिंह बेदी अघि भन्छन्, ‘विराट कोहली भारतका लागि लामो समय खेलिसके, यसैले रहाणेलाई कप्तान बनाउनुपर्छ । उनी कप्तानी गर्न सक्छन्, जबकि रोहित सेतो बल (लिमिटेड ओभर) को कप्तानी सम्हाल्न सक्छन् ।’

सन्दीपको दुई विकेटको मद्दतमा होबार्ट विजयी, सात खेलमा झारे आठ विकेट

नेपाली खेलाडी सन्दीप लामिछानेले दुई विकेट लिएको खेलमा उनी आबद्ध टोली होबार्ट हुरिकेन्स सात रनले विजयी भएको छ। अस्ट्रेलियामा जारी बिग बास लिगमा लामिछानेले सिड्नी सिक्सर्र्सविरुद्धको खेलमा दुई विकेट लिएका हुन्। टस जितेर सिड्नी सिक्सर्सले फिल्डिङ रोजेपछि होबार्टले २० ओभरमा आठ विकेट गुमाएर १८८ रन बनायो। सिड्नीले २० ओभरमा आठ विकेट गुमाएर १८१ रन मात्र बनाउन सक्यो।

होबार्टका लागि लामिछानेले चार ओभरमा २४ रन खर्चेका थिए। सन्दीपले यसक्रममा तीन चौकासमेत विपक्षी खेलाडीलाई हान्ने मौका दिए। लामिछानेले सिड्नीका ब्याट्सम्यान मोइसेस हेनरिकलाई ४३ रनमा तथा डेनियल क्रिस्टियनलाई रन नै बनाउन नदिइकन पेभेलियन फर्काए।

यसअघिको खेलमा समेत उनले दुई विकेट लिएका थिए। उनले बिग बासमा हालसम्म सात खेलमा आठ विकेट लिइसकेका छन्। लामिछाने आबद्ध टोली होबार्ट हालसम्म २७ अङ्क जोड्दै लिगको पाँचौँ स्थानमा रहेको छ। होबार्टले अब मङ्गलबार मेलबर्न रेनेगेड्ससँग खेल्ने छ। उक्त खेलमा विजयी भएमा होबार्ट अर्को चरणमा प्रवेश गर्ने सम्भावना कायमै रहने छ। रासस