क्रिकेटप्रेमी मेयर : जसले रंगशाला बनाउन २० लाख दिए!


क्रिकेट

ललितपुर। ललितपुर महानगरपालिकाले चितवन जिल्लामा निर्माणाधीन गौतमबुद्ध अन्तरराष्ट्रिय क्रिकेट रङ्‍गशालालाई २० लाख रुपैयाँ आर्थिक सहयोग गरेको छ। महानगरपालिकाका प्रमुख चिरीबाबु महर्जनले शुक्रबार धुर्मुस-सुन्तली फाउण्डेसनका अध्यक्ष सीताराम कट्टेललाई उक्त रकम बराबरको चेक हस्तान्तरण गरे।

प्रमुख महर्जनले सरकारले गर्नुपर्ने कामको जिम्मा फाउण्डेसनले लिएर गरेकामा धुर्मुस-सुन्तलीको प्रशंसा गर्दै सो रङ्‍गशालाले नेपाललाई अन्तर्राष्ट्रियस्तरको ख्याति प्रदान गर्ने विश्वास व्यक्त गरे।

फाउण्डेसनका अध्यक्ष कट्टेलले रङ्‍गशाला निर्माणको काम ८५ प्रतिशत सम्पन्‍न भइसकेको बताए। उनले भने, “आउँदो १४ महिनामा रङ्‍गशाला निर्माणको काम पूर्ण रुपमा सम्पन्‍न गर्ने विश्वास लिएका छाैं। यदि मुलुकको अवस्था सामान्य हुँदै गएमा तोकिएकै समयमै काम सम्पन्‍न हुनेछ।”

उक्त रङ्‍गशालामा २२ विधाका खेल खेल्न सकिन्छ। रङ्‍गशालामा ७७ जिल्लाका नाममा फरक-फरक कक्ष निर्माण हुनेछ जसमा ललितपुर नामक कक्ष पनि निर्माण गरिने छ। कार्यक्रममा प्रमुख प्रशासकीय अधिकृत विष्णुप्रसाद कोइरालाले महानगरपालिकाले रङ्‍गशालालाई रकम सहयोग गरी गर्न बाँकी रहेका काममा सानो मद्दत पुर्‍याएको बताए। रासस