घटिया पिच बनाउँदै दुई दिनमै भारतले खेल जित्यो


क्रिकेट

अहमदाबादः भारतीय स्पिन बलरद्वय रविचन्द्रन अश्विन र अक्सर पटेलले १८ विकेट लिएपछि इङ्ल्यान्ड विरुद्धको तेस्रो “पिन्क–बल” टेस्ट खेल भारतले दुई दिनभित्रै १० विकेटले जितेको छ । पटेलले पहिलो इनिङमा ३८ रन खर्चेर ६ विकेट लिएका थिए भने दोस्रो इनिङमा ३२ रन खर्चेर ५ विकेट लिएका थिए । अश्विनले भने पहिलो र दोस्रो इनिङमा क्रमशः ३ र ४ विकेट लिएका थिए ।

दोस्रो इनिङमा इङ्ल्यान्डको टोली ३०.४ ओभरमा ८१ रनमै अलआउट भएको थियो जसमा पटेल र अश्विनले समान १५–१५ ओभर बलिङ गरेका थिए । अहमदाबादको मटेरा रंगशालामा दिवारात्रि खेलिएको यो खेल दुई दिनभित्रै सकिएको थियो । इङ्ल्यान्डले टस जितेर पहिले ब्याटिङ रोजेको इङ्ल्यान्डले ४८.८ ओभरमा ११२ रन मात्र बनाएको थियो । तर भारतको पनि पहिलो इनिङ राम्रो रहेन ।

भारतले पहिलो इनिङमा १४५ रन बनाएको थियो । तर दोस्रो इनिङमा इङ्ल्यान्ड अझ कमजोर थियो । अश्विन र अक्सरको बलिङसामु निरिह बनेको इङ्ल्यान्डको टोली ८१ रनमै समेटिएको थियो । जितका लागि भारतले ४९ रन मात्र बनाउनु पर्ने थियो । भारतले निर्धारित लक्ष ७.४ ओभरमा विनाकुनै क्षति पूरा गरेको थियो । भारतका लागि प्रारम्भिक ब्याट्सम्यान रोहित शर्माले २५ र शुभमन गिलले १५ रन बनाएका थिए ।

अहमदाबादको सुख्खा, धुलोयुक्त पिचमा खेल्न खेलाडीहरुलाई निकै कठिन भएको थियो । कहिले बल टर्न हुने, कहिले माथि उफ्रने गरेकाले पनि भारतीय बलरलाई बढी फाइदा पुगेको थियो । खासगरी यस टेस्ट शृंखलामा रविचन्द्रन अश्विनले ४०० विकेट लिएर इतिहास रच्न सफल भएका छन् । जितसँगै भारतले चार टेस्टको वर्तमान शृंखलामा २–१ को अग्रता बनाएको छ । यो हारसँगै इङ्ल्यान्डको लर्ड्समा खेलिने विश्व टेस्ट शृंखलाको फाइनल खेल्ने मौका इङ्ल्यान्डले गुमाएको छ । (एपी)