पाकिस्तान सुपर लिग खेल्न सन्दिप पाकिस्तान उडे, कलन्दर्सबाट खेल्ने


क्रिकेट

काठमाडौं । नेपाली स्टार लेग स्पिनर सन्दिप लामिछाने पाकिस्तान सुपर लिग ( पीएसएल ) खेल्न आज पाकिस्तान प्रस्थान गरेका छन् । उनि आज बिहान ११ बजे कतार एयरवेजको बिमानबाट कतार हुदै कराची प्रस्थान गरेका हुन् । सन्दिप पाकिस्तानको कराचीमा जारि पीएसएलमा टिम लाहोर कलन्दर्सको लागि खेल्नेछन्।

पीएसएल अक्सनमा बिक्रि नभएका सन्दिपलाई लाहोरले अर्का लेग स्पिनर राशिद खानको प्रतिस्थापनको रुपमा टिममा समाबेश गरेको हो। राशिदले यो सिजन मात्र २ खेल खेलेपछि अफगानिस्तानको लागि खेल्न स्वदेश प्रस्थान गरेका थिए। राशिदले २ मार्चदेखि सुरु हुने जिम्बाब्वेसँगको टेष्ट सिरिजका कारण बीचमै पीएसएल छोडेका हुन् ।

सन्दीपले २०१९ को पीएसएलमा लाहोरबाट खेलेका थिए । सो सिजनमा उनले सात खेलमा ११ विकेट लिएका थिए । सोही सिजनमा सन्दीपले एक म्याचमा चार ओभरमा १० रन खर्चेर चार विकेट लिएका थिए ।

डेब्यू सिजनमा उत्कृष्ट प्रदर्शनका बाबजुद पनि त्यसयताका दुई संस्करणको ड्राफ्टमा भने सन्दीपलाई कुनै पनि टिमले अनुबन्ध गरेनन् । जारी पीएसएल संस्करणमा पनि ६ टिमले प्रतिस्पर्धा गर्दैछन् ।

‘बी’ डिभिजन लिगमा आज दुई खेल हुँदै

शहिद स्मारक ‘बी’ डिभिजन लिगमा आज दुई खेल हुँदैछ । दिउँसो सवा १२ बजे एन्फा कम्प्लेक्समा पुल्चोक स्पोर्टस् क्लब र श्री भगवती क्लबबीचको खेल हुनेछ ।

पुलचोक स्पोर्टस् क्लब १ अङ्कसहित तालिकाको पुछारमा अर्थात् १२ औँ स्थानमा रहेको छ भने श्री भगवती क्लब ५ अङ्कसहित १० औँ स्थानमा रहेको छ । यस्तै दिउँसो साढे ३ बजे बाँसबारी क्लब र श्री कुमारी क्लबबीचको खेल हुनेछ ।

बाँसबारी १४ अङ्कसहित लिगको तेस्रो स्थानमा रहेको छ भने श्री कुमारी क्लब ६ अङ्कसहित आठौं स्थानमा रहेको छ । यसअघि हिजो भएका खेलमा सातदोबाटो र मध्यपुर विजयी भएका थिए ।

सातदोबाटो युथ क्लबले खुमलटार युथ क्लबलाई ३–२ ले र मध्यपुर युथ एशोसियसनले टुसाल क्लबलाई २–० ले हराएको थियो । लिगमा सातदोबाटो युथ क्लब १९ अङ्कसहित शीर्ष स्थानमा रहेको छ ।